Bu gün Azərbaycan Tibb Universitetinin (ATU) rektoru, professor Gəray Gəraybəyli Bakı Sağlamlıq Mərkəzində fəaliyyət göstərən Təlim və Simulyasiya Mərkəzini ziyarət edib. Rektor bu mərkəzin fəaliyyəti ilə yaxından tanış olub, burada müəyyən fənlər üzrə tədris keçən tələbələrlə görüşüb və onlarla geniş fikir mübadiləsi aparıb.

 

Professor Gəray Gəraybəyli bildirib ki, tələbələrin, rezidentlərin və həkimlərin peşə bacarıqları səviyyəsinin yüksəldilməsi üçün bu mərkəzin fəaliyyətinin böyük önəmi var. Burada bütün səviyyələrdə tibb mütəxəssislərinin hazırlanması, orta və kiçik tibb kadrlarının hazırlıq səviyyəsinin yüksəldilməsi, fərdi praktik bacarıqların öyrədilməsi və təkmilləşdirilməsi, eyni zamanda yeni bacarıqların əldə edilməsi istiqamətində aparılan işlər təqdirəlayiqdir.

 

Onun sözlərinə görə, Azərbaycan Tibb Universiteti ilə İ.M.Seçenov adına Birinci Moskva Dövlət Tibb Universitetinin Bakı filialının nəzdində təşkil olunmuş Təlim və Simulyasiya Mərkəzində praktiki təlim, bacarıqların səviyyəsinin qiymətləndirilməsi üçün ən müasir texnologiyalar mövcuddur.

 

Daha sonra ATU-nun rektoru bu texnologiyalarla tanış olub, mərkəzin komandası və burada tədris keçən tələbələrin rəylərini öyrənib. Tələbələr burada tədris prosesinin yüksək səviyyədə aparılması üçün yaradılan şəraitdən razılıqlarını bildiriblər.

 

G.Gəraybəyli mərkəzin endoskopiya, UZİ, ginekologiya, reanimasiya, ilk yardım və təcili yardım otaqlarında robot-simulyatorlar üzərində tələbələrin keçirdikləri manipulyasiyaları izləyib. Təlim və Simulyasiya Mərkəzində yaradılan şəraitdən məmnun olduğunu bildirən rektor mərkəzin kollektivinə uğurlar arzulayıb.

 

ATU-nun Tədris şöbəsinin müdiri, dosent Kamandar Yaqubov qeyd edib ki, ATU tələbləri hər gün mərkəzdə 5 bacarıq fənninin - Venadaxili inyeksiyalar, Təxirəsalınmaz Tibbi yardım, Dispanserizasiya, Fiziki müayinə, Təməl ürək və ağciyər reanimasiyası fənlərinin tədrisində iştirak edirlər. Tədris prosesi 3 mərhələli şəkildə həyata keçirilir.

 

Kamandar Yaqubov bildirib ki, yayda daxili xəstəliklər və cərrahi xəstəliklər fənləri üzrə dövlət attestasiyana buraxılan ATU tələbələri üçün bacarıq imtahanı da bu mərkəzdə təşkil olunacaq.

 

Professor G.Gəraybəyli Mərkəzdə imtahanların keçirilməsi üçün hazırlanmış sektorla da tanış olub.

 

Qeyd olunub ki, tələbələr buradakı kabinələrə şəxsi İD kodu ilə daxil olaraq ayrılmış zaman müddətində imtahan suallarını cavablandıracaqlar. Yekunda tələbənin chek-list formasında imtahan nəticəsi çıxır. Bacarıq imtahanında iştirak edən tələbələrin imtahan nəticələri elə həmin gün universitetin portallarına yerləşdirilir.

 

Görüşdə iştirak edən Bakı Sağlamlıq Mərkəzinin direktoru, dosent Asiman Həsənov bildirib ki, təlim və simulyasiya mərkəzinin komandası yüksək ixtisaslı anestezioloq-reanimatoloqlar, mama-ginekoloqlar, kardioloqlar, cərrahlar və psixoloqlardan ibarətdir. Komanda üzvləri xarici ölkələrdə səhiyyə sahəsində mütəxəssislərin hazırlanmasında çoxillik təcrübə əldə ediblər.

 

Qeyd edək ki, Təlim və Simulyasiya Mərkəzi Azəbaycan Tibb Universiteti və İ.M.Seçenov adına Birinci Moskva Dövlət Tibb Universitetinin Bakı filialının tələbələri, rezidentləri və həkimlərin praktik bacarıqlarını artırmaq və simulyasiya təlimindən istifadə edərək müxtəlif tibb peşələri üzrə mütəxəssislərin ixtisaslarını artırmaq üçün yaradılıb. Mərkəzin işçiləri xarici ölkələrin səhiyyə mütəxəssislərinin zəngin təcrübəsindən yararlanaraq beynəlxalq standartlara uyğun olan təlim proqramlarından istifadə edirlər.