Azərbaycan Tibb Universitetinin Ailə təbabəti kafedrasının müdiri, Əməkdar həkim, professor Mustafa Salihov uzun sürən xəstəlikdən sonra 80 yaşında dünyasını dəyişib.

Aztibb.az xəbər verir ki, M.Salihov 1942-ci ildə Bakı şəhərində anadan olmuşdu. 1960-cı ildə N. Nərimanov adına Azərbaycan Dövlət Tibb İnstitutunun Müalicə-profilaktika fakültəsinə daxil olmuşdu. 1971-ci ildə aspiranturanı bitirdikdən sonra Azərbaycan Tibb İnstitutunun Hospital terapiya kafedrasında assistent, sonra isə dosent vəzifələrində çalışmışdı.

O, 1981-1984-cü illərdə Əlcəzair Xalq Demokratik Respublikasında ezamiyyətdə olmuşdu. 1987-1994-cü illərdə Azərbaycan Respublikası Səhiyyə Nazirliyinin Baş terapevti vəzifəsində çalışmışdı. 2002-ci ildə ATU-nun Böyük Elmi Şurasının qərarı ilə Poliklinik terapiya kafedrasının bazasında Azərbaycanda ilk dəfə Ailə təbabəti kafedrası təşkil olunmuş və M.Salihov həmin kafedraya rəhbər təyin edilmişdi.

M.Salihov 2002-ci ildə Beynəlxalq Ekoenergetika Akademiyasının "ailə təbabəti" ixtisası üzrə professoru seçilmişdi. 2010-cu ildə "Azərbaycan Respublikasının Əməkdar həkimi" fəxri adına layiq görülmüşdü.

Alimin elmi tədqiqatları ilkin tibbi yardım, Azərbaycanda ailə təbabətinin inkişafı problemləri, tez-tez rast gəlinən xəstəliklərin profilaktika və diaqnostikasına həsr olunmuşdu.

Xeyirxah insan Mustafa Salihovun xatirəsi onu tanıyanların qəlbində daim yaşayacaqdır.

Allah rəhmət eləsin!