BMT-nin İnsan Hüquqları Şurasının 49-cu sessiyasında çərçivəsində keçirilən “Minasız dünyaya doğru: İnsan hüquqlarının və 2030 Gündəliyinin həyata keçirilməsi üçün beynəlxalq əməkdaşlığın möhkəmləndirilməsi və yardımın səfərbər edilməsi” adlı panel iclasında Azərbaycanda əlilliyi olan şəxslərin reabilitasiyası sahəsində aparılan islahatlar barədə məlumat verilib.

 

Əmək və Əhalinin Sosial Müdafiəsi Nazirliyinin tabeliyindəki Dövlət Tibbi Sosial Ekspertiza və Reabilitasiya Agentliyinin şöbə müdiri Bahadur Rzayev tarixi Zəfərimizlə başa çatan 44 günlük Vətən müharibəsi zamanı və ondan sonra minaların partlaması səbəbindən yaralanmış azərbaycanlı mülki şəxslər və hərbçilərin effektiv reabilitasiya xidmətləri ilə əhatə olunmaları sahəsində görülən işləri diqqətə çatdırıb. O, eyni zamanda, ölkəmizdə son illərdə qurulan müasir reabilitasiya sistemi barədə məlumat verib.

 

Əlilliyi olan şəxslər və sağlamlıq imkanları məhdud uşaqlar üçün bərpa xidmətlərinin, reabilitasiya vasitələri ilə təminat sisteminin təkmilləşdirilməsi, reabilitasiya xidmətlərinə əlçatanlığın artırılması məqsədilə aparılan islahatları qeyd edib.

 

B.Rzayev bu islahatlarda qabaqcıl beynəlxalq təcrübələrə istinad edildiyini, bir sıra beynəxalq təşkilatlar, habelə Ümumdünya Səhiyyə Təşkilatı ilə fəal əməkdaşlıq həyata keçirildiyini diqqətə çatdırıb.

 

Qeyd edək ki, Cenevrədə (İsveçrə) keçirilən tədbir 4 aprel - Beynəlxalq Mina Xəbərdarlığı və Mina Fəaliyyətinə Yardım Günü ərəfəsində minaların insan hüquqlarının qorunmasına təsiri mövzusuna həsr edilib.