Florence Nightingale Xəstəxanalar Qrupunun həkim-infeksionisti, uzman həkim Feride Gökçe Demir “SARS-CoV-2 (COVID-19) kompleks diaqnostikasına müasir yanaşmalar” mövzusunda beynəlxalq elmi konfransda “COVID-19-un diaqnostikasında Türkiyə təcrübəsi” mövzusunda çıxış edib.

Aztibb.az xəbər verir ki, F.G.Demir COVID-19-un diaqnostikasında tətbiq olunan PCR testləri barədə danışıb. O, viral antigen hissəciklərini müəyyən edən antigen testləri, eləcə də infeksiya sonrası informativ olan anticisim testləri və virusa qarşı orqanizmdə yaranan immunoqlobulin E və M-i müəyyən etmək imkanına malik testlər haqqında məlumat verib. Bildirib ki, infeksiyadan sonrakı dönəmi müəyyən etməkdə effektiv olan bu testlər xüsusilə epidemioloji məlumatların formalaşdırılmasında faydalıdır.

Məruzəçi Türkiyədə COVID-19 virusunun yayılmağa başlaması ilə dövlət tərəfindən yaradılmış PCR laboratoriyaların iş prinsipi haqqında məlumat verib. Bildirib ki, yoluxma sayı artdıqca bu prosesə universitet və digər qurumların laboratoriyaları da cəlb olunmağa başlayıb.

“Hazırda Türkiyədə COVID-19-un diaqnostikası üçün 81 bölgədə 526 PCR laboratoriya mövcuddur” - deyə bildirən F.G.Demir Florence Nightingale Xəstəxanalar Qrupunun laboratoriyasının da bu siyahıda yer aldığını diqqətə çatdırıb.

O, həmçinin Türkiyədə koronavirusun geniş yayılması ilə bir çox istiqamətləri əhatə edən məlumat kitabçalarının hazırlanaraq əhaliyə paylandığını vurğulayıb.