“Həkimlərimizi tanıyaq!” rubrikamızda sizlərə pasiyentləri arasında böyük rəğbət qazanmış, yüksəkixtisaslı cərrah, tibb üzrə fəlsəfə doktoru Namiq Novruzovu təqdim edirik.

Namiq Novruzov 1996-cı ildə Azərbaycan Dövlət Tibb Universitetinin II Müalicə profilaktika fakültəsini və 1996-1997-ci illərdə Bakı şəhəri 5 saylı kliniki xəstəxanada cərrahiyyə ixtisası üzrə internaturanı bitirib. Həkim 2003-2007-ci illərdə Moskva şəhərində Rusiya Diplomdansonrakı Tibbi Təhsil Akademiyasında Təcili və təxirəsalınmaz cərrahiyyə kafedrasının aspiranturasında təhsilini başa vuraraq, tibb üzrə fəlsəfə doktoru elmi adını qazanıb.

Namiq Novruzov 1998-ci ildə dövlət tibb müəssisəsində ümumi cərrah kimi fəaliyyətə başlayıb. O, 2003-2007-ci illərdə N.V.Sklifosovski adına Moskva şəhər Elmi-Tədqiqat Təcili Yardım İnstitutunda ümumi cərrah, 2009-2012-ci illərdə Mərkəzi Gömrük Hospitalında ümumi cərrah, 2012-2013-cü illərdə isə Türkiyədə Malatya İnönü Universitetinin Qaraciyər Transplantasiyası İnstitutunda cərrah işləyib. 2013-cü ildən Mərkəzi Gömrük Hospitalında Ümumi cərrahiyyə şöbəsinin rəisi vəzifəsində çalışır.

Öz sahəsi üzrə biliklərini daim təkmilləşdirən cərrah Namiq Novruzov Rusiyanın, Türkiyənin və Avropanın müxtəlif aparıcı klinikalarında qarın boşluğu və çanaq üzvlərinin laparoskopik cərrahiyyəsi üzrə ixtisasartırma, 2010-cu ildə Ankara Universitetinin Tibb fakültəsində endoskopiya və ERCP üzrə kursları bitirib.

O, dünyanın bir çox ölkələrində elmi konfrans və seminarlarda cərrahiyənin geniş sahələrini əhatə edən müxtəlif mövzularda çıxışlar edir. Hazırda Azərbaycan Tibb Universitetinin doktorantıdır.