Ölkəmizdə Vətən müharibəsi əlillərinin reabilitasiya xidmətləri və müasir reabilitasiya vasitələri ilə təminatı işləri aparılır, həmçinin işlə təmin olunmalarına dəstək göstərilir.

Həmin qazilərdən biri olan Naftalan şəhərində yaşayan qazimiz Qiyas Tağıyev Prezident İlham Əliyevə məktubunda hər zaman qayğı və diqqətlə əhatə olunduğunu və minnətdarlığını bildirib.

Aztibb.az həmin məktubu təqdim edir:

"Hörmətli cənab Prezident, Müzəffər Ali Baş Komandan.

Sizin qətiyyətli addımlarınız sayəsində Azərbaycanın hərb tarixinə yeni səhifələr yazıldı. Torpaqlarımızın azad olunacağına ümidimizi heç vaxt itirməmişdik. Çünki Sizin rəhbərliyinizlə ölkəmizin iqtisadi baxımdan sürətli inkişafı problemlərin həllinə yol açırdı. Mən hərbçi olaraq, ordumuzun qüdrətlənməsinin, onun maddi-texniki bazasının möhkəmləndirilməsinin canlı şahidiyəm. Bu nailiyyətlərin sonda bizi Qarabağa aparacağına tam qəlbimizlə inanırdıq.

Mən bir qazi kimi hər zaman qayğı və diqqətlə əhatə olunmuşam. Mən Vətən müharibəsi zamanı döyüşdə sağ ayağımın bir hissəsini itirmişəm. Dövlət tərəfindən mənə Avropa istehsalı olan son nəsil elektron əlil arabası təqdim olunmuşdur. Bir müddət öncə mən Sizin tapşırığınızla Bakı şəhərində müalicə alıb yüksək texnologiyalı protezlə təmin olunmuşam. Artıq mənim sevincimin həddi-hüdudu yoxdur. Çünki mən Naftalan şəhərində yenicə istifadəyə verilmiş müalicə-sağlamlıq mərkəzində işlə də təmin olunmuşam. Bu, bir daha göstərir ki, dövlətimiz şəhid ailələrini, qaziləri hər zaman düşünür və onların qarşılaşdığı problemləri həll edir.

Cənab Prezident, bütün bunlara görə Sizə özümün və ailəmin adından dərin və sonsuz minnətdarlığımı bildirirəm.

Uca Tanrı Sizi və ailənizi, millətimizi qorusun".