"Hörmətli cənab Prezident,

Sizin sayənizdə bu gün Azərbaycan xalqı çox qürurludur. Otuz ilə yaxın işğal altında qalmış torpaqlarımızı düşməndən azad etdik, neçə illər həsrətini çəkdiyimiz doğma el-obalarımıza qovuşduq. Mən Vətən müharibəsində iştirak etdiyimə və qalib Ordunun əsgəri olduğuma görə ikiqat sevincliyəm. Müharibə zamanı xəsarət alaraq əlil olsam da, doğma torpaqlarımızın azadlığını görmək, dövlət qayğısı ilə əhatə olunmaq mənə böyük təsəlli verir. Yeri gələndə öz-özümə deyirəm ki, Vətən üçün, torpaq üçün şirin canı belə təhlükəyə atmağa dəyərmiş.

Azərbaycan dövlətinin şəhid ailələrinə, müharibə əlillərinə göstərdiyi diqqət və qayğı əvəzsizdir. Müraciətlərimizə həssaslıqla yanaşılır, problemlərimizin həllinə lazımi kömək göstərilir. Mən üzləşdiyim problemlə əlaqədar Sizə müraciət etmişdim. Müraciətimə diqqətlə yanaşıldı və mənə kömək göstərildi.

Cənab Prezident, Azərbaycan xalqının firavan yaşaması üçün gördüyünüz işlərə görə Sizə dərin minnətdarlığımı bildirir, uzun ömür, cansağlığı arzu edirəm. Sizin məqsədyönlü fəaliyyətiniz xalqımızın problemlərinin həllinə, xoş güzəranının təmin olunmasına yol açır. Yolunuz hər zaman açıq olsun!".