Martın 4-6-da Türkiyənin Adana şəhərində 5-ci Çukurova Qastro-İntestinal Xəstəliklər və Cərrahiyyəsi konqresinin mükafatlandırma mərasimi keçirilib. Mərasimdə Azərbaycan Tibb Universitetinin (ATU) əməkdaşları da təltif olunublar.
Aztibb.az xəbər verir ki, tədbirdə ATU-nun Ümumi cərrahiyyə kafedrasının əməkdaşı, Azərbaycan Endoskopik Laparoskopik Cərrahlar cəmiyyətinin sədri, tibb elmləri doktoru Müsviq Həsənov moderator və məruzəçi qismində iştirak edib.
Konqresin açılış mərasimində çıxış edən M.Həsənov ATU-nun rektoru, professor Gəray Gəraybəylinin salamlarını konfrans iştirakçılarına çatdırıb, həmçinin rəhbərlik etdiyi cəmiyyət adından təşəkkür plaketini təqdim edib.
Konqresdə M.Həsənovun təqdim etdiyi məruzə böyük maraqla qarşılanıb.
Sonda konqresdəki çıxışı və aktiv iştirakına görə ATU əməkdaşı xüsusi mükafata layiq görülüb.
Həmçinin, tibb elmləri doktoru Müşfiq Həsənlinin rəhbəri olduğu ERCP xəstəlikləri ilə bağlı tədqiqat işi birinci yerə, "Sözel Sunum Birincilik Ödülü"nə layiq görülüb.
Qeyd edək ki, Adana şəhərində baş tutan konqresə 5 ölkənin nümayəndə heyəti qatılıb. Azərbaycanda, eyni zamanda dünyanın bir sıra ölkələrində tibb sahəsində müvəffəqiyyətləri, peşəkar müalicə və müayinə metodları ilə seçilən məşhur həkimlərin iştirak etdiyi tədbirdə müasir tibbi proseslər ətrafında müxtəlif fikir mübadiləsi aparılıb.