Bu gün Azərbaycan Tibb Universitetinin (ATU) Tədris Terapevtik Klinikasında 8 mart - Beynəlxalq Qadınlar Günü münasibətilə tədbir keçirilib.

 

Tədbirdə çıxış edən klinikanın direktoru, professor Surxay Musayev xanım əməkdaşları və onların timsalında bütün Azərbaycan qadınlarını əlamətdar gün münasibətilə təbrik edib, onlara cansağlığı və gələcək fəaliyyətlərində yeni-yeni uğurlar arzulayıb. 

 

Professor Surxay Musayev hər il dünyada olduğu kimi ölkəmizdə də bu bayramın dövlət səviyyəsində qeyd edildiyini diqqətə çatdırıb. Bildirib ki, tarixin bütün dönəmlərində qadınlarımız cəmiyyətimizin mənəvi dayağı olmuş, ölkəmizin simasını müəyyənləşdirmək üçün böyük fədakarlıqlar göstərmişlər:

"Tarixi keçmişin ağır sınaqlarından alnıaçıq, üzüağ çıxmış Azərbaycan qadınları tarix boyu xalqımızın taleyində əhəmiyyətli rol oynayırlar. Azərbaycan qadınları ölkəmizin ictimai-siyasi, elm, təhsil və mədəni həyatında yüksək fəallığı, zəngin biliyi, vətənpərvərliyi, dövlətçilik ənənələrinə sədaqəti və mərdliyi ilə də seçilirlər. Bunun bariz nümunəsi kimi istər klinikamızın pandemiya klinikası kimi fəaliyyət göstərdiyi dönəmdə, istərsə də 44 günlük Vətən müharibəsi zamanı klinikamızın qadın kollektivinin necə cəsur, ləyaqətlə öz xidmətlərini yerinə yetirdiyini deyə bilərəm. Biz bu gün də həmin qadınlarımızla fəxr edir, onlarla qürur duyuruq".

 

Tədbirdə çıxış edən professor Sahib Musayev və professor Amaliya Əyyubova da bütün qadınları Beynəlxalq Qadınlar Günü münasibətilə təbrik edib, onlara işlərində uğurlar arzulayıblar.