Bu gündən etibarən TƏBİB tərəfindən Ümumdünya Səhiyyə Təşkilatının (ÜST) dəstəyi və Türkiyənin Hacettepe Universiteti Bioetika Tədqiqat və Təlim Mərkəzi ilə əməkdaşlıq çərçivəsində “Tədqiqat etikası və etik komissiyaların fəaliyyəti” mövzusunda baza təlimlərinə start verilib.

Aztibb.az xəbər verir ki, təimlərin keçirilməsində əsas məqsəd respublikamızda tibb sahəsində tədqiqat etikası istiqamətində olan problemləri həll etmək üçün tədqiqatçıları beynəlxalq araşdırma standartları ilə tanış etmək, sahə üzrə mütəxəssislərin bilik və bacarıqlarını təkmilləşdirmək, eləcə də müvafiq təlimat və metodik tövsiyələr verməkdən ibarətdir.

Tədbirdə Milli Məclisin Səhiyyə Komitəsinin sədri, millət vəkili, akademik Əhliman Əmiraslanov, Türkiyənin ölkəmizdəki səfiri Cahid Bağcı, TƏBİB-in İdarə Heyətinin sədri vəzifəsini icra edən Vüqar Qurbanov, Azərbaycan Respublikası səhiyyə nazirinin müavini Nadir Zeynalov,  İcbari Tibbi Sığorta üzrə Dövlət Agentliyinin Strateji təhlil departamentinin rəhbəri Araz Nəsirov, həmçinin ÜST-ün Azərbaycandakı nümayəndəliyinin əməkdaşı Halil İbrahim Durak, Hacettepe Universiteti Bioetika Təlim və Tədqiqat Mərkəzinin rəhbəri Nüket Örnək Büken, eləcə də ali təhsil müəssisələrinin və tabeli elmi institutların rəhbər şəxsləri iştirak edib.

Tədbiri TƏBİB-in İdarə Heyətinin sədri vəzifəsini icra edən Vüqar Qurbanov açaraq son illərdə səhiyyənin təkmilləşdirilməsi istiqamətində həyata keçirilən dövlət siyasətindən, ölkə başçısının səhiyyə sahəsində apardığı məqsədyönlü islahatlardan danışıb. Ölkəmizin həm struktur, həm də keyfiyyət baxımından yeni səhiyyə modelinə keçdiyini deyən V.Qurbanov tibbin inkişafı, müayinə və müalicə metodlarının təkmilləşdirilməsinin məhz keyfiyyətli və beynəlxalq standartlara uyğun elmi-tədqiqatların aparılması nəticəsində meydana gəldiyini bildirib.

Daha sonra çıxış edən Nadir Zeynalov, Əhliman Əmiraslanov, Cahid Bağcı, Halil İbrahim Durak və Nüket Örnək Büken təlimlərin məqsədi, tibb sahəsində tədqiqat etikasının mahiyyəti, həmçinin problemlərin həlli üçün birgə tədqiqatların önəmi və beynəlxalq əməkdaşlığın əhəmiyyətindən danışıblar.

Məlumat üçün qeyd edək ki, Yeni Klinikada baş tutacaq təlimlər 4 mart tarixinədək davam edəcək.