Rusiyanın N.F.Qamaleya adına Milli Epidemiologiya və Mikrobiologiya Tədqiqat Mərkəzində hazırlanmış Sputnik V peyvəndinin keyfiyyətinə dair testlər başa çatıb və dərman mülki dövriyyəyə buraxılıb.

Aztibb.az "Rossiyskaya Gazeta"ya istinadən xəbər verir ki, bölgələrə peyvənd tədarükünün bu həftə başlanması və kütləvi peyvəndlərin noyabr-dekabr aylarında keçirilməsi planlaşdırılır.

"Vektor" Dövlət Tədqiqat Mərkəzində yaradılan ikinci rus peyvəndinin isə sınaqlarının xəstəxana mərhələsi uğurla başa çatıb. Təcrübədə 100 nəfər iştirak edib. Bu vaksinlərin hər ikisi də böyüklər üçündür.

Ekspertlər təcili olaraq uşaqlar üçün də vaksinin hazırlanmalı olduğunu bildirir.

Qamaleya Tədqiqat Mərkəzi də artıq uşaq peyvəndinin ilkin hazırlıq mərhələsi haqda məkumat verib. Bildirilib ki, uşaq peyvəndi həm doza, həm də tətbiq baxımından qənaətbəxş olacaq. Uşaq vaksinlərinin burun damcısı formulunda olduğu ehtimal edilir. Lakin yetkinlərə bu il peyvənd edilsə də, uşaqalara 2020-ci ildən sonra tətbiq ediləcəyi gözlənilir.

Uşaqlarda peyvənd sınaqlarına yalnız yetkinlərin bütün mərhələləri uğurla başa çatdıqdan sonra başlanılacaq. Bu, təxminən 9 ay çəkəcək. Belə ki, qeydiyyatdan sonrakı araşdırmalar çərçivəsində könüllülər 3-4 ay ərzində peyvənd ediləcək və daha sonra 6 aylıq bir müşahidə müddəti olacaq. Uşaqlara protokola əsasən vaksin vurulacaq: öncə 14-18 yaş arası olanlara peyvənd vurulacaq. Problem qeydə alnmazsa, 12-14 yaşlı yeniyetmələrə, sonra isə yaşı daha az olanlar peyvənd ediləcək.