"Elmi-Tədqiqat Mamalıq və Ginekologiya İnstitutu" Publik Hüquqi Şəxsdə 29 sentyabr 2021-ci il tarixindən etibarən Təcili yardım şöbəsi fəaliyyət göstərir. Şöbə normal, vaxtından əvvəl, planlı və təcili cərrahi doğuşları, eləcə də preeklampsiya, hipertenziya və vaxtından əvvəl doğuş təhlükəsi ilə patoloji doğuşları qəbul edir.
Bu barədə Aztibb.az-a institutun Təcili yardım şöbəsinin müdiri Kəmalə Mahmudova məlumat verib.
Şöbənin iş prinsipindən bəhs edən K.Mahmudova bildirib ki, Təcili yardım şöbəsinə gecə növbəsi zamanı əsasən doğuş fəaliyyəti başlayan, dölyanı mayesi vaxtından əvvəl axan, ciftin vaxtından əvvəl ayrılması ilə qanaxması baş verən hamilələr müraciət edirlər. Belə pasiyentlərə ilkin müayinə və baxış aparılır, lazım olduğu təqdirdə onlar xəstəxananın digər şöbələrinə yönləndirilirlər.
Həkimin sözlərinə görə, "Elmi-Tədqiqat Mamalıq və Ginekologiya İnstitutu" Publik Hüquqi Şəxs III səviyyəli müəssisə olduğundan rayonlardan vaxtından əvvəl doğuş diaqnozu və III çapıq ilə hamilələr də bura müraciət edirlər.