Peyvənd olunan hamilələrin xəstəliyi keçirmə dövrü həm qısa, həm də yüngül olur.

Bu barədə Aztibb.az-a Mərkəzi Gömrük Hospitalının mama-ginekoloqu Nərmin Muradova məlumat verib.

Həkim bildirib ki, ölkəmizdə hamiləlik zamanı COVID-19-a qarşı peyvəndlənmə əks göstəriş hesab olunsa da, dünyanın bir çox ölkələrində qadınlar hamiləlikdə də peyvənd olunur.  

N.Muradovanın bildirdiyinə görə, hamilələr özlərini əsasən son üç aylıqda qorumalıdırlar.

“Bunun səbəbi ağciyər həcminin azalmasına bağlı virusun yanaşı ağırlaşmaları artırması ehtimalı ilə əlaqədardır. Son üçaylıqda virusa yoluxan və peyvənd olunmamış hamilələrdə həm yenidoğulmuşa, həm də anaya təcili yardım ehtiyacının artdığı müşahidə olunur”.

ABŞ-ın “Centers for disease control and prevention” federal agentliyi bildirir ki, bu müddət ərzində virusa yoluxan insanların bəziləri yüngül, digərləri isə ağır simptomlarla qarşılaşırlar. Virus aşkar olunduqdan 2-14 gun ərzində simptomlarını göstərməyə başlayır. Hamilə qadınlarda aşağıdakı simptomlar hiss edilərsə mütləq COVID-19 testi verilməlidir:

- qızdırma ya üşütmə;

- öskürək;

- nəfəs darlığı vəya təngənəfəslik;

- zəiflik, yorğunluq;

- əzələ və ya bədən ağrıları;

- baş ağrısı;

- boğaz ağrısı;

- iy və dad itməsi;

- burun axması;

- qusma və ya bulantı;

- diareya.

Həkim hamiləlikdən öncə diabet, tiroid, ürək, ağciyərlə bağlı xəstəlikləri olanlara peyvənd vurdurduqdan sonra hamiləlik planlamağı tövsiyə edib.

N.Muradova qeyd edib ki, Kaliforniyada “Providence Saint John’s Health Center”in qadın sağlamlığı üzrə mütəxəssisi, həkim Şeri Ros hamilələrin, hamiləlik planlayanların, südverən anaların peyvənd olunmasında heçbir əks göstəriş olmadığını bildirib.

“Aparılan araşdırmalar peyvəndin anaya və dölə heçbir əks təsiri olmadığını göstərib. Bətndəki dölə ötürülən anticisimlər sayəsində ana özünü və uşağını rahatlıqla virusun əlavə ağırlaşmalarından qoruya bilər”, - deyə N.Muradova qeyd edib.  

N.Muradovanın sözlərinə görə, bu yaxınlarda Floridada dünyaya gələn körpədə COVID-19-a qarşı anticimlər aşkarlanıb. Bu isə ananın hamiləliyin 36-cı həftəsində vurdurduğu peyvəndlə əlaqəli olub. Doğulan körpədə heç bir əlavə  və ya yan təsir görülməyib və təcili yardıma ehtiyac duyulmayıb.