Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri vəzifəsini icra edən Vüqar Qurbanovun əmri ilə Səadət Hüseynova Elmi-Tədqiqat Mamalıq və Ginekologiya İnstitutunun direktorunun elmi işlər üzrə müavini təyin olunub.

 

Bu barədə Aztibb.az-a Elmi-Tədqiqat Mamalıq və Ginekologiya İnstitutundan məlumat verilib.

 

Qeyd olunub ki, 1975-ci il təvəllüdlü Səadət Hüseynova Azərbaycan Tibb Universitetinin (ATU) Pediatriya fakültəsinin məzunudur. O, ATU-nun Neonatologiya kafedrasında klinik ordinatura və aspirantura təhsili alıb.

 

2004-2006-cı illərdə ATU-nun Neonatologiya kafedrasında baş laborant, 2006-2016-cı illərdə həmin kafedrada assistent, 2016-2017-ci illərdə isə ATU-nun 3-cü Uşaq xəstəlikləri kafedrasında assistent vəzifələrində çalışıb.

 

Səadət Hüseynova 2004-cü ildə "Antifosfolipid sindromu olan hamilə qadınlardan doğulan uşaqların erkən neonatal dövrdə vəziyyətinin qiymətləndirilməsi" mövzusunda namizədlik dissertasiyasını müdafiə edərək tibb üzrə fəlsəfə doktoru elmi dərəcəsini alıb. 

 

Alim bir çox ölkələrdə keçirilən konfrans və seminarlarda ingilis, alman, rus və türk dillərində məruzəçi kimi çıxış edib. Onun 100-dən çox məqaləsi (15-i xarici ölkələrdə) çap olunub.

 

O, Azərbaycan Respublikası Prezidenti yanında Elmin İnkişafı Fondunun dəstəklədiyi müsabiqədə “Vaxtından əvvəl doğulan uşaqların erkən yaşdakı neyro-somatik statusunun formalaşmasında perinatal faktorların rolu” mövzusunda qrant layihəsinin rəhbəri olub.