Yanvar ayı ərzində icbari tibbi sığorta çərçivəsində Kliniki Tibbi Mərkəzin Kardiologiya şöbəsinə müraciət edən xəstələrin sayı min nəfərdən çox olub.

Aztibb.az xəbər verir ki, bu barədə mərkəzin Mətbuat xidmətinin rəhbəri Elnur Hidayətoğlu deyib.

O, bildirib ki, onların müraciət etmə səbəbləri daha çox hipertoniya xəstəliyi, ürəyin işemik xəstəliyi və ürəyin aritmiyası ilə bağlı olub.

"Həkim baxışından keçən xəstələr müayinə olunub və qısa müddətdə müalicələrinə başlanılıb.

Kardiologiya şöbəsində stasionar xidmət almış xəstələrin sayı isə 104 nəfər olub. Onların 35-i Poliklinika şöbəsindən, 36-sı Acil şöbəsindən daxil olub. 33 stasionar xidmət almış xəstələrdən 30-u Reanimasiya şöbəsindən, 3-ü isə digər şöbələrdən köçürülüb.

Qeyd edək ki, oturaq həyat tərzi, hərəkətsizlik, stress, qeyri-sağlam qidalanma ürək xəstəliklərinin əsas yaranma səbəbləridir. Ürək xəstəlikləri insanlarda irsi yolla və ya yaş faktorundan asılı olaraq da yarana bilər.

Ürək-damar xəstəliyi aşkar edildikdə ilk növbədə fiziki aktivliyi artırmaq, hərəkət etmək ən əsası isə stressdən uzaq olmaq lazımdır.

Ürək-damar xəstəliyindən əziyyət çəkən insanların həyat tərzini dəyişməsi, ziyanlı vərdişlərdən uzaq durması, tez-tez həkim konsultasiyalarında olması məsləhət görülür.