Azərbaycan Respublikasının Prezidenti yanında Ali Attestasiya Komissiyasının qərarı ilə Azərbaycan Tibb Universitetinin (ATU) 1-ci Daxili xəstəliklər kafedrasının assistenti Yasmin Kamran qızı Rüstəmovaya tibb elmləri doktoru elmi dərəcəsi verilib.

 

Aztibb.az-ın məlumatına görə, Yasmin Rüstəmova 24 may 2021-ci ildə "Kardiologiya" ixtisası üzrə "İşemik etiologiyalı disfunksional miokard: problemlər və həll yolları" mövzusunda doktorluq dissertasiyasını müdafiə edib.

 

Tədqiqatda ilk dəfə olaraq koronar yatağın çoxdamar zədələnməsi ilə ürəyin işemik xəstəliyi olan xəstələrdə perkutan koronar müdaxilənin uzunmüddətli nəticələri miokardın müasir görüntüləmə metodlarından istifadə etməklə öyrənilib. Həmçinin miokardın revaskulyarizasiyasına dair göstərişlər dəqiqləşdirilib və endovaskulyar müdaxilənin əlverişsiz proqnozu üçün risk faktorlarının müəyyənləşdirilməsinə əsaslanaraq cərrahi müalicə üçün xəstələrin seçim alqoritmi təkmilləşdirilib. Təklif edilən alqoritmin tətbiqi ilə işemik xəstəliyi olan xəstələrin rasional müalicə, həmçinin revaskulyarizasiya strategiyası seçilə bilər.

 

Qeyd edək ki, Yasmin Rüstəmova 2012-ci ildə İtaliyanın Piza şəhərində ürək maqnit-tomoqrafiyası üzrə ixtisaslaşaraq, Azərbaycanda ilk dəfə bu müayinəni tətbiq edib. O, 2018-ci ci ildə Avropa sertifikasiyasından keçərək ürək MRT mütəxəssisi sertifikatını, həmçinin İsveçrənin Zürix Universitetində 2 illik diplomsonrası təhsildən sonra "Ürək çatışmazlığı mütəxəssisi" diplomunu alıb.

 

Bundan başqa, alim "Springer" nəşriyyatında dərc olunan "Cardiac Magnetic Resonance Atlas: 101 Clinic Cases" kitabının birinci müəllifidir.

 

O, Azərbaycan Kardiologiya Cəmiyyətinin vitse-prezidenti, Avropa Kardiologiya Cəmiyyətinin isə fəxri üzvüdür.