Azərbaycan Tibb Universitetinin (ATU) Əczaçılıq texnologiyası və idarəçiliyi kafedrasının dosenti, t.ü.f.d. Sevil Mehralıyeva Türkiyənin Ərzurum şəhərindəki Atatürk Universitetində təbii mənşəli xammallar əsasında nano-dərman formalarının alınması istiqamətində tədqiqatlar aparır.

Aztibb.az xəbər verir ki, Sevil Mehralıyeva səfər zamanı Atatürk Universitetinin Tibb və Əczaçılıq fakültəsinin professor-müəllim heyəti ilə görüşüb.  

Görüşdə Altay Respublikasından Azərbaycana gətirilmiş, yerli iqlim şəraitinə uyğunlaşdırılmış maral pantalarının tərkibinin unikallığı, onların yeni tətbiq sahələrinin  axtarışı istiqamətində geniş  diskussiyalar aparılıb. Maral pantalarından  Rusiya və Cənub-Şərqi Asiyada müxtəlif dərman və kosmetik  vasitələrinin istehsalında, sonsuzluq, ürək-damar, dayaq-hərəkət sistemləri, sinir və həzm sistemi və s.  xəstəliklərin müalicəsində  tətbiq olunduğu vurğulanıb.

Tədqiqat zamanı azərbaycanlı alim maral pantalarından laboratoriya şəraitində hazırladığı nanokapsullar, nanoemulsiya və nanogelin analizlərini Atatürk Universiteti Doğu Anadolu Yüksək Texnoloji Uygulama ve Araştırma Mərkəzinin (DAYTAM) aparıcı mütəxəssisləri ilə birlikdə uğurla yerinə yetirib.

Birgə işlər çərçivəsində maral pantalarından hazırlanan nano-dərmanlardan osteoartrit, yaddaş zəifliyi, vaxtından əvvəl yaşlanmadan əziyyət çəkən pasiyentlərə kömək məqsədilə ATU və Atatürk Universitetinin birgə əməkdaşlığı  ilə layihələrin hazırlanması təşəbbüsü də irəli sürülüb.