Elmi-Tədqiqat Tibbi Bərpa İnstitutunun Klinik Neyrofiziologiya laboratoriyasının əməkdaşı, professor Sədaqət Hüseynova Tibbi Ərazi Bölmələrinin İdarəetmə Birliyinin (TƏBİB) 4 fevral 2022-ci il tarixli qərarı ilə "Azərbaycan Elmi-Tədqiqat Tibbi Bərpa İnstitutu" publik hüquqi şəxsin elmi işlər üzrə direktor müavini vəzifəsinə təyin edilib.

 

Əvvəlcə Elmi-Tədqiqat Tibbi Bərpa İnstitutunun direktor vəzifəsini icra edən, baş həkim, tibb üzrə fəlsəfə doktoru Nizami Nəbiyev çıxış edərək S.Hüseynovanı yeni vəzifə təyinatı ilə bağlı təbrik edib, onun müəssisədəki fəaliyyəti dövründə gördüyü işlərdən bəhs edib. Bildirib ki, professor tibb sahəsində yüksəkixtisaslı elmi kadrların hazırlanmasında da əvəzsiz xidmətlər göstərib.

 

Daha sonra çıxış edən Kurort ehtiyatlarının öyrənilməsi bölməsinin böyük elmi işçisi Sevda Nəsrullayeva S.Hüseynovanın tutduğu yeni vəzifəyə layiqli namizəd olduğunu deyib, ona fəaliyyətində uğurlar arzulayıb.

 

Tədbirdə, həmçinin institutun Terapiya şöbəsinin müdiri Malik Bəylərov, Balneofizioterapiya bölməsinin böyük elmi işçisi Mehrab Salmanov və digərləri çıxış edərək S.Hüseynovanın sadə, təvazökar, obyektiv, incə və həssas qəlbli, yüksək mədəni səviyyəyə malik bir insan olduğunu bildiriblər. 

 

Sonda professor S.Hüseynova təbriklərə görə həkim həmkarlarına və elmi işçilərə minnətdarlığını bildirib. Qeyd edib ki, bele bir vəzifəyə təyin olunmaq böyük məsuliyyət və etimaddır.