“Həkimlərimizi tanıyaq" rubrikamızda sizlərə peşəkarlığı, yanaşması ilə seçilən və pasiyentləri arasında böyük rəğbət qazanmış yüksəkixtisaslı travmatoloq-ortoped Müseyib Əhmədovu təqdim edirik.
Dr. Müseyib Əhmədov 1994-cü ildə Azərbaycan Tibb Universitetini bitirib, 1994-1995-ci illərdə 1 saylı Hərbi Hospitalda travmatologiya və ortopediya ixtisası üzrə internatura təhsili alıb. O, 1997-1998-ci illərdə Ukraynanın Xarkov şəhərində Sitenko adına Travmatologiya və Ortopediya İnstitutunda ordinatura keçib.
Əmək fəaliyyətinə 1995-ci ildə Ukraynanın Mariupol şəhərində başlamış Müseyib Əhmədov 2000-2002-ci illərdə Bakı şəhəri Travmatoloji və Ortopediya klinik xəstəxanasında işləyib. 2002-2009-cu illərdə Səudiyyə Ərəbistanı Krallığının Buraydah şəhərində yerləşən Buraydah Mərkəzi Hospitalında həkim travmatoloq-ortoped kimi fəaliyyət göstərib. 2009-cu ildən isə Mərkəzi Gömrük Hospitalında travmatoloq-ortoped vəzifəsində çalışır.
O, dünya mətbuatını izləyərək tibbin ən yeni nailiyyətlərini öz təcrübəsində tətbiq edir. Müseyib Əhmədov həkimlik fəaliyyəti ilə bərabər, həmçinin çoxsaylı mötəbər beynəlxalq və yerli konfrans, seminar və təkmilləşdirmə kurslarında iştirak edib. Bu sıradan 2014-cü ildə İtaliyanın Roma şəhərində keçirilmiş "Oynaq və sümük cərrahiyyəsi” və 2016-cı ildə Avstriyanın Zalsburq şəhərində keçirilmiş "Uşaq ortopediya və travmatologiyası” konfranslarını, 2017-ci ildə Türkiyənin Antalya şəhərində XXVII Beynəlxalq Türk Ortopedik və Travmatoloji konqresini, eləcə də 2018-ci ildə İspaniyanın Barselona şəhərində baş tutmuş Avropa Ortoped-Travmatoloqlar Assosiasiyasının 19-cu konqresini göstərmək olar.
