Sosial Xidmətlər Agentliyinin sosial xidmət müəssisəsində psixososial dəstək layihəsi həyata keçirilir.
Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyində Ümumdünya Səhiyyə Təşkilatının (ÜST) Azərbaycan ofisinin nümayəndələri ilə görüş keçirilib.
Agentliyin sədri Vüqar Behbudov ÜST-ün Azərbaycan üzrə sağlamlıq naminə həmrəylik təşəbbüsü çərçivəsində "Azərbaycanda uzunmüddətli psixi sağlamlıq müəssisələrinin xəstələrinə psixososial dəstək" layihəsinin əhəmiyyətini qeyd edib. O, psixi sağlamlıq müəssisələrində sosial reabilitasiyaya dəstək məqsədi daşıyan layihənin Agentliyin 1 saylı psixonevroloji sosial xidmət müəssisəsində də icra edildiyini bildirib.
Daha sonra ÜST-ün psixosağlamlıq və psixososial dəstək, qeyri-infeksion və infeksion xəstəliklər üzrə proqramlarının koordinatoru Elturan İsmayılov və Təşkilatın ilkin səhiyyə, sağlamlıq üçün həmrəylik proqramlarının koordinatoru Tural Qulu layihənin önəmindən bəhs ediblər.
Görüşdə layihə üzrə görülən işlər müzakirə olunub.
