Azərbaycan Tibb Universitetinin (ATU) Tədris Terapevtik Klinikasında stasionar şöbələrin illik hesabatına dair toplantı keçirilib. Toplantıda klinikanın 2022-ci il yanvar ayındakı fəaliyyəti və bir sıra stasionar şöbələrin illik hesabatları dinlənilib.
Əvvəlcə klinikanın direktoru, professor Surxay Musayev çıxış edərək professor-müəllim heyətini və bütün kollektivi Azərbaycan Tibb Universitetinin tədris proqramlarının beynəlxalq akkreditasiyadan keçməsi münasibətilə təbrik edib. ATU-nun beynəlxalq akkreditasiyadan keçməsinin əhəmiyyətini vurğulayan professor Surxay Musayev bu hadisənin Azərbaycanın səhiyyə tarixində, eləcə də ölkəmizdə ilk olduğunu diqqətə çatdırıb.
Sonra klinikanın müalicə işləri üzrə direktor müavini Fəridə Hacıyeva yanvar ayına olan hesabatı təqdim edib. O, həmçinin son aylar ərzində müəssisənin tibbi fəaliyyəti və mövcud çətinliklər barədə məlumat verib.
Daha sonra klinikanın Endokrinologiya, Reanimasiya və İntensiv terapiya, Şəkərli diabet və Kardiologiya şöbələrinin illik hesabatları dinlənilib.
Endokrinologiya şöbəsinin müdiri, dosent Səbinə Məşədiyeva sözügedən şöbənin illik hesabatını təqdim edib.
Ardınca Reanimasiya və İntensiv terapiya şöbəsinin müdiri, dosent Əliyar Sultanov, Şəkərli diabet şöbəsinin müdiri Sevil Mustafayeva və Kadiologiya şöbəsindən Əli Balakişiyev şöbələrin illik hesabatı ilə çıxış ediblər. Hesabatlarda şöbələrdə il ərzində ambulator və stasionar xəstə qəbulu, şöbələrin tibbi fəaliyyəti və görülən işlər barədə ətraflı məlumat verilib.
Tədbirdə dosent Arzu Bəydəmirova "Regional İnkişaf” İctimai Birliyi (RİİB) və Azərbaycan Könüllü Həkimlər Assosiyasiyasının (AKHA) birgə təşkilatçılığı, Tibbi Ərazi Bölmələrini İdarəetmə Birliyinin (TƏBİB) dəstəyi ilə şəhid ailələrinin üzvləri və qazilər üçün regionlarda təşkil olunan növbəti tibbi aksiyanı iştirakçıların diqqətinə çatdırıb. A.Bəydəmirova paytaxtın müxtəlif dövlət və özəl xəstəxanalarında çalışan könüllü həkim heyəti tərəfindən keçirilən bu aksiyaya Tədris Terapevtik Klinikada çalışan hər bir tibb işçisini dəvət edib.
Dinlənilən hesabatlardan sonra çıxış edən prof. Surxay Musayev bundan sonrakı dövr üçün klinikanın işinin təşkili və qarşıda duran vəzifələr haqqında danışıb. O, həmçinin daxili nizam-intizam, orta və kiçik tibb işçilərinin yol verdiyi bəzi nöqsanları, klinikada mövcud olan bəzi problemləri və personalın klinikaya giriş-çıxışına nəzarət məsələlərini də əməkdaşların diqqətinə çatdırıb.
Sonda əməkdaşların sualları cavablandırılıb, bəzi məsələlərin həlli ilə bağlı tapşırıqlar verilib.
