Reanimasiya şöbəsinə götürülmüş yenidoğulmuşu ailə anamnezi səbəbi ilə yüksək riskli qəbul ediriksə, tək nəfərlik izolyasiya otağında ən azı gün boyunca izolyasiya edilməlidir. Bu müddət ərzində infeksiya əlamətləri meydana gələrsə, uyğun xəstəxanaya göndərilməli və müalicə təyin edilməlidir. 

Bunu Azərbaycan Tibb Universitetinin Tədris Cərrahiyyə Klinikasının Neonatologiya şöbəsinin müdiri Aygün Rüstəmxanlı Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin və Mərkəzi Gömrük Hospitalının birgə təşkilatçılığı ilə “COVID-19 pandemiyası zamanı mamalıq və ginekoloji problemlərə müasir baxış” mövzusunda keçirilən beynəlxalq elmi konfransda çıxışı zamanı deyib.

Yenidoğulmuş körpənin idarəolunması məsələlərindən söz açan məruzəçi qeyd edib ki, əgər koronavirus diaqnozu qoyulmadan öncə başqa yenidoğulmuşlar eyni otaqda olmuşlarsa, digər bütün yenidoğulmuşlar da COVID-19 inkar edilənə qədər izolə olunmalıdır.

O, yenidoğulmuşların transportu haqqında məlumat verərək qeyd edib ki, bu xəstələr üçün özəl olaraq ayrılmış ambulans və transport küvezi istifadə olunmalıdır:

"Yenidoğulmuşu transport edəcək ambulansda tənəffüs dəstəyi cihazı daxil, bütün ləvazimatlar və dərmanlar hazır olmalı, şəxsi qoruyucu vasitələr, dezinfeksiyaedicilər hazır olmaldıır. Transferdən əvvəl və sonra ambulans dezinfeksiya edilməli, bütün personal qoruyucu vasitələr geyinməlidir".