Mərkəzi Klinikada həyata keçirilmiş böyrək nəqli əməliyyatında donorun böyrəyinin 3 arteriyasi olduğu müəyyən olunub. Buna baxmayaraq böyrək laparoskopik yolla Mərkəzi Klinikanın Ümumi cərrahiyyə, orqan və toxumalar transplantasiyası şöbəsinin ümumi cərrahı, t.ü.f.d. Zaur Xəlilov tərəfindən donordan alınıb və bu böyrək müvəffəqiyyətlə xəstəyə köçürülüb.

 

Aztibb.az xəbər verir ki, bu barədə Mərkəzi Klinikadan məlumat verilib. 

 

Bildirilib ki, çoxsaylı arteriyası olan donorlarda həm donor əməliyyatları, həm də alıcı əməliyyatları riskli orqan köçürülməsi əməliyyatlarından hesab edilir.

 

Tam anurik (günlük sidik çıxışı olmayan, həftədə 3 dəfə dializ alan) xəstənin köçürülən böyrəyinin əməliyyat stolunda sidik çıxışı başlayıb.

 

Əməliyyatdan 3 gün sonra donor, 1 həftə sonra isə xəstə evə yola salınıb.

 

Qeyd edək ki, əməliyyatın həyata keçirilməsində Mərkəzi Klinikanın Ümumi cərrahiyyə, orqan və toxumalar transplantasiyası şöbəsinin ümumi cərrahı, t.ü.f.d. Zaur Xəlilovun, ümumi cərrah, transplantoloq Tariyel Nadirovun və nefroloq Xəyal Rüstəmovun böyük əməyi keçib.