Aztibb.az-ın "Həkimlərimizi tanıyaq!" rubrikası bu dəfə Mərkəzi Gömrük Hospitalının Reanimasiya və intensiv terapiya şöbəsinin anestezioloq-reanimatoloqu Sevda Quliyeva haqqındadır.

Dr. Sevda Quliyeva 2010-cu ildə Azərbaycan Tibb Universitetinin Müalicə-profilaktika fakültəsini bitirib, 2010-2011-ci illərdə Mərkəzi Dəmiryol Xəstəxanasında "terapevt" ixtisası üzrə internatura keçib. 2012-ci ildə tibb üzrə uzmanlıq imtahanı verərək, İstanbul Universitetinin İstanbul Tibb fakültəsinə qəbul olub. 2017-ci ildə "anestezioloq-reanimatoloq" ixtisası üzrə uzman həkim adını alıb.

O, 2017-2019-cu illərdə İstanbul şəhərində fəaliyyət göstərən Avrasiya Hospitalında anestezioloq-reanimatoloq kimi fəaliyyət göstərib. 2019-cu ildən Mərkəzi Gömrük Hospitalında Reanimasiya və İntensiv terapiya şöbəsində anestezioloq- reanimatoloq vəzifəsində çalışır.

Daim öz üzərində çalışan Sevda Quliyeva öz sahəsi üzrə beynəlxalq konqres, konfrans və simpoziumlarda iştirak edib, ölkəmizi layiqincə təmsil edib.

Azərbaycanlı həkim Türkiyə Anesteziologiya və Reanimasiya Dərnəyinin təşkilatçılığı ilə keçirilən 53-cü Beynəlxalq Konfrans çərçivəsində Alparslan Turan adına keçirilən klinik araşdırma yarışmasında "Laparoskopik əməliyyatlarda fərqli intraoperativ oksigen inspirasiyat fraksiyalarının qlikokaliks üzərinə təsiri" adlı tədqiqatına görə birinci yerə layiq görülüb. Bu qalibiyyətlə bağlı Amerikanın tanınmış Klivland Xəstəxanasına (Cleveland Clinic) dəvət alıb.

Anestezioloq-reanimatoloq həm də bütün bacarıq, təcrübə və biliyini səfərbər edərək COVID-19 virusunun yeni ştamlarına yoluxan pasiyentlərin müalicəsi ilə məşğul olur. Sevda Quliyeva bildirir: “Situasiyanı vaxtında qiymətləndirmək, qərar vermək və müəyyən müalicə üsulunu seçməkdən çox şey asılıdır. Öz müalicə prosesimizdə beynəlxalq təcrübədən də yararlanıb tətbiq edirik. Sağalan və ailəsinə qovuşan xəstələri görmək bizi daha da ruhlandırır. Bu bəlaya hamımız səfərbər olaraq qalıb gələcəyik."