Avropa İttifaqı (Aİ) - Ümumdünya Səhiyyə Təşkilatı (ÜST) əməkdaşlığı ilə keçirilən “Sağlamlıq üçün həmrəylik təşəbbüsü” və “COVID-19 əleyhinə vaksinasiyaya dəstək” layihələri çərçivəsində sertifikatların təqdimatı və təhvil-təslim mərasimi təşkil edilib.

Aztibb.az xəbər verir ki, tədbir COVID-19 pandemiyası ilə mübarizədə sözügedən layihələrin dəstəyini vurğulamaq, davamlı tibbi təhsil sahəsi üzrə tibb müəssisələrinin və tibb işçilərinin fəaliyyətlərini qiymətləndirmək, eləcə də infeksiyanın qarşısını almaq və nəzarət üzrə ləvazimatların təhvil-təslimini həyata keçirmək məqsədilə təşkil edilib.

Qısa müddət ərzində ölkə üzrə 15 təlim mərkəzində 7000-dən çox tibb işçisi üçün “COVID-19 vaksinasiyası”, “COVID-19 xəstələrinin stasionarda idarəolunması”, “Təməl jəyat dəstəyi” və “Təkmil həyat dəstəyi” mövzuları üzrə təlimlər təşkil edilib.

Eyni zamanda, onlayn öyrənmə imkanlarının təbliği məqsədilə OpenWHO platformasında Azərbaycan səhifəsi təqdim edilib. Ötən il ərzində Azərbaycanın tibb işçiləri bu platformada 15000 onlayn kursa qoşulub.

Tədbir zamanı, 50 tibb müəssisəsi və tibb işçisi Aİ-ÜST layihələri çərçivəsində davamlı tibbi təhsil istiqamətində göstərdikləri dəstəyə və fəal iştiraka görə təltif edilib.

Sonda tibb müəssisələrində infeksiyaların qarşısının alınması və mübarizə tədbirlərini gücləndirilməsi məqsədilə “Sağlamlıq üçün həmrəylik təşəbbüsü” çərçivəsində TƏBİB-ə 1000 əl gigiyenası dispenseri, 2000 litr əl dezinfeksiyaedici vasitə, 3000 kiçik əl dezinfeksiyaedici (100 ml) və 3000 kəmər klipi təhvil verilib.