Quduzluq ağır yoluxucu xəstəliklərdən biridir. Bu virus pişik, it kimi vəhşi heyvanlardan insana keçir. Ağır əlamətlərlə xarakterizə olunan quduzluq əksər hallarda ölümlə nəticələnir.

Quduzluq insan orqanizminə təkcə dişləmə ilə deyil, həm də quduz heyvanın ağız suyunun açıq yaraya dəyməsi nəticəsində düşə bilir.

Aztibb.az xəbər verir ki, bu barədə Mərkəzi Gömrük Hospitalının həkimi Nərgiz Kərimova "ATV səhər" verilişində məlumat verib.

Həkimin sözlərinə görə, heyvan dişləməsi zamanı mütləq həkimə müraciət olunmalı, təcili yardım briqadası çağırılmalıdır.

Quduzluğun ilk əlamətləri haqqında məlumat verən N.Kərimova bu zaman insanda işıqdan və sudan qorxma, daha sonra mərkəzi sinir sisteminin zədələnməsi, boğulma hallarının baş verdiyini bildirib.

“Quduzluq vaxtında müalicə olunmazsa, peyvəndlər vurulmazsa 100 faizə qədər ölümlə nəticələnə bilir”, - deyə N.Kərimova bildirib.

O, qeyd edib ki, heyvan dişləməsindən sonra ilk yardım kimi yaranın üzəri su və sabunla yuyulmalı və tənziflə örtülməlidir.