Aztibb.az xəbər verir ki, bu gün Azərbaycan Tibb Universitetinin (ATU) Tədris Terapevtik Klinikasının müalicə işləri üzrə direktor müavini Fəridə Hacıyevanın və həkim-rezidentlərinin iştirakı ilə “COVID-19 sonrası görülən ağırlaşmalar” mövzusunda seminar keçirilib.

 

Seminarda çıxış edən klinikanın Pulmonologiya şöbəsinin həkim-rezidenti Nigar Namazlı COVID-19 sonrası görülən ağırlaşmalar haqqında ətraflı məlumat verib.

 

Qeyd edib ki, bəzi xəstələrdə sağaldıqdan həftələr və ya aylar sonra ağırlaşmalar görülə bilir:

 

"Bəzi xəstələr həftələr içində sağalmağa başlasa da, bəzilərində bu sağalma 12 həftəyə qədər uzana bilər. Xəstəliyi keçirən insanlarda ilk başda yüngül başlayan şikayətlər ağırlaşa bilər ki, buna tibbdə "post kovid sindrom" deyilir. Post-kovid sindromda ən çox görülən ağırlaşmalar əsasən yorğunluq, dispne, döş qəfəsində ağırlıq, yaddaşda zəiflik və ya diqqət azalması, insomnia, oynaq ağrıları, öskürək, ishal, "anosmia" və ya "disgesia", günlük hərəkətlərdə azalma və ya artan yorğunluq, mensturasiyada dəyişiklik, temperatur yüksəkliyi kimi əlamətlərdir".

 

Həkimin sözlərinə görə, xəstəlik hər nə qədər zəif əlamətlərlə başlasa da, genetik olaraq yatqın insanlarda və ya müalicəsi effektiv olmayan, bununla yanaşı əlavə xəstəlikləri olan şəxslərdə ayrı-ayrı orqanlarda fəsadlar törədə bilər.

 

"Araşdırmalar nəticəsində aydın olmuşdur ki, ACE 2 reseptoru virusun hüceyrələrə girməsi üçün reseptor fəaliyyətinə sahibdir. ACE 2 ürək, ağciyər, böyrək, və s. kimi bir çox orqanda tapıldığı üçün ən çox ağırlaşmalar da məhz bu orqanlarda aşkar olunub" -  deyə o, bildirib.

 

Sonda klinikanın digər həkim-rezidentlərilə birgə mövzu ətrafında geniş müzakirələr aparılıb, suallar cavablandırılıb.