Son zamanlar geniş yayılmış virus xəstəlikləri zamanı əsas əlamətlərdən biri də burun tutulmasıdır. İnsanlar əksər hallarda bu problemin qarşısını həkim məsləhəti olmadan almağa çalışır, apteklərdən müxtəlif burun spreyləri alaraq istifadə edirlər. Lakin mütəxəssislər bu kimi vasitələrdən tez-tez istifadəni tövsiyə etmirlər.

Aztibb.az xəbər verir ki,  Mərkəzi Gömrük Hospitalının həkim-otolarinqoloqu Elvin Əzizov ATV-yə müsahibəsində bu barədə fikrilərini bölüşüb.

Burnumuzun tənəffüs funskiyasından başqa orqanizm üçün həm də qoruyucu rol oynadığını vurğulayan həkim qeyd edib ki, bu, xaricdən daxil olan havanın nəmləndirilməsi, isidilməsi və zərərsizləşdirilməsi hesabına baş verir.

Həkim qeyd edib ki, soyuq havaya çıxanda burunda tutqunluq, tıxanıqlıq yaranır ki, bunun da səbəbi burun boşluğunda olan kapilyarların genişlənməsi, burunda olan qoruyucu mexanizmlərin işə düşməsi və bu zaman selikli qişanın şişməsi hesabına baş verir. Həmçinin toz hissəcikləri və yaxud yuxarı tənəffüs yollarının kəskin respirator infeksiyaları zamanı burun boşluğuna düşmüş bakteriyalar və viruslar nəticəsində də burunda burunun selikli qişasının bu qoruyucu funksiyası işə düşür və həmin vaxt burunda tıxanıqlıq yaranır:

“Bu zaman xüsusi spreylərdən istifadə edirik. Belə vasitələr müxtəlifdir, onları qarışdırmaq olmaz. Çünki hər burun spreyinin öz funskiyası var.

Hazırda ən çox istifadə olunan spreylərdən biri də dəniz suyu tərkibli olanlardır. Dəniz suyunun vasitəsilə artıq həmin mikroorqanizmlər seliyi yuyub xaric edir.

İkinci növ burun damcıları nazal spreylərdir ki, onların funksiyası burun boşluğunda olan kapilyarların yığılması və nəticədə burun tənəffüsünün yaxşılaşmasına yönəlir.

Üçüncüsü isə daha çox istifadə etdiyimiz - yerli qlükokortikosteroid spreylərdir ki, onlar burun boşluğunun öz təbii qoruyucu sistemini bərpa etməyi nəzərdə tutur”.

Mütəxəssis bildirib ki, bəzən qrip olarkən, yaxud burnumuzda tıxanıqlıq yaranarkən burun spreylərindən kortəbii şəkildə, onun istifadəsinə dair göstərişləri oxumadan istifadə edirik. Lakin bu, bəzən zərərli ola bilər.

“Qrip olan zaman damarbüzücü nazal spreylərdən istifadə etmək olar”, deyən həkim əlavə edib ki, bu vasitələrdən  3-5 gündən artıq istifadə etmək olmaz.

Onun sözlərinə görə, ən çox tövsiyə olunan yüksək duzluluğa malik dəniz suyudur. Bu məhlul həm qrip zamanı yuxarı tənəffüs yollarının kəskin respirator infeksiyaları zamanı artıq seliyin xaric olunmasına kömək edir. Bu spreylərdən gün ərzində maksimum 3 dəfə istifadə etmək lazımdır. Bu müddəti keçdikdə bir sıra fəsadlar baş verə bilər. Odur ki, burun spreylərindən istifadə edərkən diqqətli olmalıyıq.