Beynəlxalq Xərçəng Araşdırma Agentliyinin hesablamalarına görə, siqaretin tərkibində xərçəngə səbəb olan 55 maddə tapılıb. Hər il dünyada 4 milyon, hər gün isə 11 min insan siqaret səbəbli xəstəliklərdən dünyasını dəyişir. Təbii ki, siqaret  qadınla  kişi orqanizminə eyni dərəcədə ziyan vurur. Siqaret tüstüsündə 4 mindən çox zərərli maddə var. Gündə bir qutu siqaret çəkən insanın minlərlə dəfə tüstünü içə çəkmə hərəkəti etdiyini nəzərə alsaq, orqanizmə daxil olan zərərli kimyəvi maddələrin miqdarını asanlıqla anlamaq olar.

Aztibb.az xəbər verir ki, 9 Fevral Ümumdünya Siqaretdən İmtina Günü çərçivəsində Mərkəzi Gömrük Hospitalının invaziv kardioloqu Samir Mustafayev siqaretin zərərləri barədə məlumat verib.

Həkimin sözlərinə görə, siqaret tüstüsündə olan əsas maddələr kokain və morfi qədər asıllıq yarada bilir.

"Nikotin qanda oksigenin daşınmasına mane olan və ölümə yol açan maddədir. Nikotinə asılılıq insanları siqaret çəkməyə davam etdirir, lakin əsas ziyanı vuran siqaret tüstüsündəki qətrandır", - deyə S.Mustafayev bildirib.

Həkim qeyd edib ki, araşdırmalara görə, gündə 1 ədəd siqaret çəkənlərdə ürək xəstəliyi riski siqaret çəkməyənlərlə müqayisədə 50 %, insult riski isə 30% daha yüksəkdir. Siqaret çəkmənin ən ölümcül nəticəsi xərçəng yox, ürək-damar xəstəlikləridir. Bu siqaret çəkmədən nəticələnən erkən ölümlərin 48% təşkil edir.