Əməliyyatların laporaskopik icrası müddət baxımından müəyyən qədər vaxt tələb etsə də, faydalılıq baxımından bu üsul daha üstün hesab olunur.
Aztibb.az xəbər verir ki, bu barədə Mərkəzi Gömrük Hospitalının “Facebook” səhifəsi üzərindən həyata keçirilən canlı yayımda “Uşaqlarda laparoskopik əməliyyatlar” mövzusunda çıxışı zamanı uşaq cərrahı Vüsal Cəfərov məlumat verib.
“Laporaskopiya yenidoğulmuşlarda güvənlə tətbiq oluna bilər”, - deyə qeyd edən V.Cəfərov xüsusilə apendisit əməliyyatlarında laporaskopik üsulun qızıl standart hesab olunduğunu vurğulayıb.
Həkimin sözlərinə görə, bəzi hallarda laporoskopiya diaqnostik məqsədlərlə istifadə oluna bilər. Uşaq cərrahiyəsində bu məqsədlə laporaskopiyadan istifadə üçün heç bir yaş məhdudiyyəti yoxdur.
O, laporaskopiyanın çatışmayan cəhətlərindən bəhs edərək bildirib ki, açıq əməliyyatlarda qanamanı nəzarətdə saxlama imkanı daha çoxdur: “Bununla yanaşı, bəzi əməliyyatlarda, o cümlədən hidrosel əməliyyatında uğur əldə etmək üçün onu laporaskopik deyil, açıq icra etmək vacibdir”.
Həkim, həmçinin uşaq urologiyasında laporaskopiyanın üstünlüklərindən danışaraq xüsusilə anadangəlmə uroloji problemlərlə doğulan uşaqlarda bu üsulun tətbiqinin effektiv olduğunu diqqətə çatdırıb.