"Artan yoluxmaya qarşı tək çarə  - "buster" doza".

Səhiyyə Nazirliyi İctimai Səhiyyə və İslahatlar Mərkəzinin nümayəndəsi, həkim Vəfa Ağayeva “Facebook” üzərindən keçirilən canlı yayımda “Omikron ştamı və artan yoluxma sayı təhlükəlidirmi?” sualını cavablandırıb.

O, bildirib ki, təəssüf ki, son zamanlar Azərbaycanda koronavirusa yoluxma sayı 7000-in üzərindədir. Yoluxma artıq 5000-i ötdüyü zaman, bu, bizim üçün siqnal idi. Belə sürətli artım hazırda bütün dünya ölkələrində müşahidə olunur.

Bu, əsasən həm dünyada, həm də ölkəmizdə geniş yayılmış Omikron ştamının digərləri ilə müqayisədə 3-4 dəfə yüksək yoluxuculuq qabiliyyətinə malik olmasına bağlıdır. Ölkəmizdə də yoluxmanın kəskin artması məhz bu ştamla əlaqədardır.

Həkim Omikron ştamından qorunmağın yeganə yolunun peyvəndləmə və “buster” doza olduğunu söyləyib:

“Həm ÜST, həm də ölkəmizin bütün səhiyyə qurumları bildirir ki, hazırda “buster” dozanın tətbiqi çox önəmlidir. Yoluxma sayı artsa da, xəstələnənlər arasında ağırlaşma halları çox azdır. Çünki Omikron ştamı daha yüngül keçir. Digər səbəb isə ondan ibarətdir ki, ölkədə əksər insanlar 1-ci, 2-ci və hatta “buster” dozanı alıblar. Bu da sübut edir ki, hazırkı ştamlar Omikrona qarşı effektivdir”.