"Əgər övladım yemək yemir, ancaq şirniyyatla qidalanır" deyirsinizsə, deməli problem uşağın iştahına deyil, zərərli qida vərdişlərinə görədir.

Aztibb.az-ın xəbərinə görə, həkim-pediatr Günay Rəsulova uşaqlarda zərərli qida vərdişlərinin fəsadlarından bəhs edərkən belə deyib. Həkimin sözlərinə görə, əksər hallarda yemək yeməyən uşaqlar şirniyyat, abur-cubur və digər şəkərli qidalara üstünlük verirlər. Çünki onlar öyrəşib ki, yemək yeməyəcək və onlara şirniyyat veriləcək:

"Çalışın uşaqlara ara öyünlərdə yüksək şəkər tərkibli qidalar verməyin, uşaq ac qalmasın deyə şirinçay içirməyin. Belə olduğu təqdirdə şəkərli qidalardan sonra uşağın qan şəkər səviyyəsi davamlı olaraq yüksək olduğuna görə, bu uşaqlar aclıq hiss etmir, yemir.

Təbii ki, iştahsızlığın başqa səbəbləri də ola bilər (müxtəlif xəstəliklər, somatik problemlər və s.). Eləcə də uşaq virus və ya bakteriyal infeskiya keçirisə, bu müddətdə də iştahsız ola bilər. Lakin çox vaxt əsas səbəb uşaqların zərərli qida vərdişləri və qeyri-düzgün qidalanma rejimidir. Bunu mütləq gözdən keçirin".