Aztibb.az-ın xəbərinə görə, tanınmış reabilitoloq, fizioterapevt, idman zədələri üzrə mütəxəssis, osteopat Pərvin Əkbərov bu barədə məlumat paylaşıb.

 

Onun sözlərinə görə, skelet əzələləri - kəllə, alt çənə, onurğa, ətraf  və çanaq arasında yaranmış anatomik “zəncir” səbəbindən müxtəlif pozğunluqlarda həlledici rol oynayır.

 

Aparılmış tədqiqatlar dişləmə və ya dişlərin düzülüşünün uşaqların yerişinə necə təsir etdiyini öyrənmişdir. Ümumilikdə 605 uşaq arasında aparılan tədqiqat nəticəsində yerimə problemləri ilə dişləmə problemlərinin biri-birindən asılı olduğu aşkar olunmuşdur:

 

"Digər kiçik araşdırma ilə yerimə və çənənin vəziyyəti arasında asılılığın olduğu müəyyən edilmişdir. Çənənin quruluşundan, ağızın açılışının genişliyindən asılı olaraq uşaqlarda yerimə surətinin əhəmiyyətli dərəcədə dəyişdiyi müəyyən olunmuşdur.

 

Alt çənənin yerləşməsi baş və boyun duruşuna, çiyin qurşağı və dilaltı sümüyümüzə (hyoid sümüyü) təsir göstərir. Çənə sümüyünün düzgün quruluşu (duruşu) düzgün dil duruşu ilə bağlıdır. Dilin ağız damında yerləşməsi boyun əzələlərini aktivləşdirir. Bu duruşu qorumağa başlamaq üçün dilinizin ucu yuxarı ön dişlərin arxasında dayanmalı və dilin kökü boğazın arxasındakı yumşaq damağa yapışmalıdır".

 

Həkim əlavə edib ki, irəli baxan baş pozası gün ərzində səbəbi bilinməyən daimi baş ağrılarına təkan verir. Eyni zamanda ağızda çəkilmiş dişlər, çənənin bağlanma və açılma problemləri, həmçinin dişləmə problemləri onurğa deformasiyalarına və yeriş formalarına mənfi təsir göstərir.