Uşaqlarda bəzən "yalançı" öskürək müşahidə olunur. Əsas etibarilə müəyyən xəstəliyə yoluxub sağaldıqdan sonra azyaşlılarda olan bezdirici, qıcıqlandırıcı, gün ərzində çox sıx təkrarlanan öskürək valideynləri narahat edir. Onlar uşağın nəfəs almadan, quru öskürdüyünü deyirlər ki, bu, "tik öskürək" hesab olunur.  

 Aztibb.az-ın xəbərinə görə, həkim-pediatr Günay Rəsulova bu barədə paylaşım edib.

Onun sözlərinə görə, belə öskürəklərin əsas xüsusiyyəti uşaq yatarkən itməsidir.  Belə ki, uşaq yuxuda olarkən öskürək tam kəsilir. Lakin gün içində quru və bezdirici formada davam edir:

"Çox vaxt belə öskürək zamanı müayinə etdikdə patologiya aşkar edilmir. Bronxlar və ağciyər təmiz olur. Eyni zamanda pasiyentin üst tənəffüs yollarında uşağı öskürdəcək səbəb aşkar edilmir.  Buna görə də bezdirici öskürəklər zamanı dəqiq, hərtərəfli müayinə vacibdir".

G.Rəsulova əlavə edib ki, tik öskürəkləri zamanı nevroloq müayinəsinə də ehtiyac yarana bilər.