Bir çox insan göz zəifliyi üçün eynək seçərkən qiymətinin münasib olmasına üstünlük verir. Bu kimi eynəklər gözlərə necə təsir edir? Keyfiyyətsiz eynək istifadəsi hansı göz problemlərinə gətirib çıxara bilər? Ümumiyyətlə, göz zəifliyi üçün eynək seçərkən nələrə diqqət edilməlidir?

Bu barədə Aztibb.az-a Diaqnoz Tibb Mərkəzinin oftalmoloqu Tünzalə Vəliyeva açıqlama verib.

T.Vəliyevanın sözlərinə görə, hazırda satışda münasib qiymətə satılan, lakin keyfiyyətinə nəzarət olunmayan eynəklərə çox rast gəlinir.

“Eynəklərin seçilməsində ən vacib məsələ nömrənin dəqiqliyi və optik şüşənin mərkəzinin pasiyentin göz mərkəzi ilə üst-üstə düşməsidir”, - deyən həkim bildirib ki, münasib qiymətə olan eynəklərdə bu məsələlər dəqiq deyil. O, əlavə edib ki, şüşənin mərkəzi və nömrəsi dəqiq olmadıqda göz tez zəifləyir və vaxtından əvvəl katarakataya səbəb ola bilir.

T.Vəliyevanın bildirdiyinə görə, ümumiyyətlə, eynək seçimi edərkən onun üz quruluşuna necə oturmasına fikir vermək lazımdır.

“Eynək nə çox balaca, nə də çox böyük olmalıdır. Eynəklər iki cür olur - yaxın və uzaq. Yaxını görmə eynəyi nə qədər balaca olsa bir o qədər yaxşıdır ki, uzağa baxdıqda gözə mane olmasın. Uzaq eynəyi pasiyentin zövqünə görə seçilir. Şüşələrə gəldikdə isə həm mineral şüşə, həm də orqanik şüşə mövcuddur. Orqanik şüşənin də gözə heç bir ziyanı yoxdur. Müasir dövrdə əsas təlabat orqanik şüşələrdir. Bu eynəklərin əsas üstünlüyü ondan ibarətdir ki, orqanik şüşələrdən istənilən örtükdə şüşə hazırlamaq mümkündür”.

Həkim vurğulayıb ki, şüşələrdən hansı məqsədlə istifadə ediləcəyi də böyük önəm daşıyır. Eynək iş prinsipinə uyğun seçilməlidir. Əgər yazmaq və oxumaqla əlaqədar eynəyə təlabat varsa, sadə, ağ orqanik şüşə, əgər kompüter, telefon kimi işlərdə istifadə olunacaqsa antiblik örtüklü və daha yeni texnologiya olan Nano Blue örtüklərdən də istifadə edilə bilər.

Oftalmoloq qeyd edib ki, eynək seçimində ən vacib məsələ eynəyin düzgün təyin edilməsi və eynək seçimində işin mütəxəssisinə müraciət edilməsidir.