Aztibb.az-ın xəbərinə görə, bunu həkim nefroloq Taleh Nağdəliyev deyib. Həkim 24 saatlıq (sutkalıq) sidik toplama qaydalarından bəhs edib.

 

O, bildirib ki, böyrək funksiyaları haqqında geniş məlumat almaq və ya bəzi xəstəliklər zamanı sidikdə artan maddələrin dəqiq miqdarını təyin etmək üçün həkimlər müəyyən testlərə 24 saatlıq sidikdə baxılmasını tələb edirlər.

 

 

1. Sidik toplanılması başlanan səhər ilk sidik ayaqyoluna atılır və saatı qeyd olunur (məsələn, saat 08:00 )

2. Bu saatdan etibarən gündüz və gecə boyunca bütün sidik xüsusi toplanılma qablarına (məsələn, təmiz şüşə balon) yığılır. Toplanan sidiyin miqdarının diaqnoz üçün çox böyük əhəmiyyəti olduğundan tam miqdarda toplanılması önəmlidir.

3. Növbəti gün ilk səhər sidiyi də (məsələn, saat 08:00 ) toplama qabına əlavə olunur və bununla da 24 saatlıq sidik toplanılması yekunlaşır. Toplanan sidiyin miqdarı xəstə tərəfindən dəqiq ölçülür (məsələn, 1200-1500 və ya 2200 ml) və laboratoriyaya bu miqdar haqqında məlumat verilir. Toplanılan sidikdən analiz qabına əlavə olunub laboratoriyaya çatdırılır.

 

Həkim əlavə edib ki, toplama qabları olaraq yuyucu vasitə, qazlı, spirtli içkilər və s. qablardan istifadə olunması məsləhət deyil. Sidik toplanıldıqdan sonra sərin yerdə saxlanılmalı və ən qısa zamanda laboratoriyaya çatdırılmalıdır.

 

Pasiyentlər və həkimlər üçün çox önəmli olan bu testin düzgün aparılması məqsədilə qeyd olunan məqamlara diqqətlə yanaşılmalı və aydın olmayan nüanslarla bağlı həkimlə əlaqə saxlanılmalıdır.