Aztibb.az xəbər verir ki, pediatr-neanotoloq Nurəngiz Hacıyeva son günlər uşaqlar və böyüklər arasında geniş yayılmış xəstəlik barədə məlumat paylaşıb. Son günlər hər il olduğu kimi uşaqlar və böyüklər arasında İnfluenza A virusunun sıx görülməkdə olduğunu deyən həkim, bu virusun qış aylarında yuxarı tənəffüs yollarının ən çox xəstəlik törədən viruslarından olduğunu söyləyib. Qeyd edib ki, bu virus həmişə qış fəslində olur və olacaq. Lakin əvvəlki 2 ildə karantinlə əlaqədar uşaqların ətraf mühitdən təcrid edilməsi hazırda uşaqların daha həssas olmasına gətirib çıxarmışdır:

 

"Xəstəliyin gedişatı böyüklərə nisbətən uşaqlarda daha ağırdır. Xüsusən təkrar-təkrar xəstələnmə halları, müalicə bitəndə uşaqların yenidən xəstələnməsi, orta qulaq və ağciyərdə yaratdığı fəsadlara rast gəlinir. Virus hava-damcı yolu ilə keçir və yoluxan şəxs 5 gün müddətindən ətrafa qarşı yoluxdurucu olur. Buna görə də bağca, məktəb, əyləncə məkanları kimi qapalı yerlərdə virusa yoluxma ehtimali daha çox olur.

 

Virusun əsas əlamətləri valideynlərin ən çox təşvişə düşdüyü  38 dərəcədən yüksək temperatur, baş, əzələ, boğaz ağrısı, öskürək, burun axıntısı, qusma və ishaldır.

 

Xəstəliyin yüngül gedişatında uşağın hərarəti düşür, onun əhvalı yaxşı olur və maye içirsə, 5 gün gözləmək lazımdır. Uşaqlara ev şəraitində saktlik yaratmaq vacibdir:

 

"Burun boşluğunu daim dəniz suyu ilə yumaq, ağrıkəcisi və hərarətsalıcı dərman (ibuprofen və ya panadol) vermək lazımdır. Xəstəlik 5-7 günə geriləyir. Digər simptomlar azalsa da, öskürək anidən kəsilmir, bu, bir müddət davam edə bilər. Əgər uşaqda nəfəs darlığı, tənəffüs sayında artım varsa, həkimə müraciət etmək tövsiyə olunur. Uşağın qarın əzələsinə baxaraq 1 dəqiqədə nə qədər nəfəs alıb-verdiyinə əsasən təngnəfəsliyi yoxlamaq olar".