İstanbulun Boğaziçi Universitetinin kimya fakültəsinin professoru Rana Nomak Sanyal və komandasının ağciyər xərçənginə qarşı hazırladığı dərman preparatının laboratoriya işləri tamamlanaraq klinik tədqiqatlara başlanılıb.
Aztibb.az AZƏRTAC-a istinadla xəbər verir ki, 18-75 yaş arası təkrarlanan, metastatik və ya irəliləmiş ağciyər xərçəngindən əziyyət çəkən xəstələr üçün hazırlanan dərmanın birinci faza tədqiqatları Ankara Onkoloji Tədris və Araşdırma Xəstəxanasının Klinik Araşdırma Mərkəzində aparılır.
Bu mərhələdə tədqiqatlar ümumilikdə 16 xəstə üzərində aparılacaq. Tədqiqatın faza-1a mərhələsində altı könüllü xəstəyə maksimum dözümlülük dozası tətbiq ediləcək, faza-1b mərhələsində isə 10 könüllü xəstə üzərində preparatın effektivlilik və təhlükəsizlik dərəcəsi qiymətləndiriləcək.
Birinci faza sınaq mərhələsi yeni dərman üçün ilk klinik başlanğıc nöqtəsi hesab edilir ki, bu da laboratoriya şəraitində effektivliyi sübut edilmiş bir dərman və ya molekulun xəstələr üzərində təsiri, dozası və yan təsirləri ilə bağlı tədqiqatların qiymətləndirilməsi deməkdir.
Qeyd edən ki, adı çəkilən preparat Türkiyədə xərçəngə qarşı hazırlanan ilk dərmanlardan biridir.