Tanınmış uroloq-androloq, M.Cavadzadə adına Respublika Kliniki Uroloji Xəstəxanasının baş həkimi, uşaq urologiyası uzmanı Pərviz Hacıyev Avropa Uşaq Urologiyası Cəmiyyətinin Təhsil Komitəsinə üzv seçilib.
Aztibb.az xəbər verir ki, bu barədə uzman həkim sosial şəbəkədə paylaşım edib.
Qeyd edək ki, Pərviz Hacıyev Ankara Universiteti Tibb fakültəsinin məzunudur. O, 2015-ci ildə Ankara Universitetində "Urologiya" üzrə uzmanlıq təhsili almışdır. 2015-ci ildə YDUS (Yan Dal Uzmanlık) imtahanında Türkiyə üzrə 2-ci yeri əldə etmiş və Ankara Universitetində Uşaq urologiyası üzrə uzmanlıq təhsilinə başlamışdır. 2019-cu ildə təhsilini başa vuran azərbaycanlı həkim "Uşaq urologiyası uzmanı" dərəcəsini almışdır.
O, 2013-2014-cü illərdə Avropa Uşaq Urologiyası Konqreslərində (ESPU) ən yaxşı araşdırmaların müəllifi kimi 2 dəfə birinci yerə layiq görülmüşdür. 2019-cu ildə Belçikada keçirilən Avropa Uşaq Urologiyası Bordunun imtahanlarını verərək FEAPU (Avropa Uşaq Uroloqu) titulunu almışdır.