Millət vəkili, Milli Məclisin Mədəniyyət Komitəsinin sədri Qənirə Paşayeva Azərbaycan Respublikası Səhiyyə Nazirliyinin Elmi-Tədqiqat Mamalıq və Ginekologiya İnstitutunun direktoru, prof. Cəmilə Qurbanova ilə görüşüb, onu institutun 35 illik yubileyi münasibətilə təbrik edib.

 

Aztibb.az xəbər verir ki, görüşdə Qənirə Paşayeva Elmi-Tədqiqat Mamalıq və Ginekologiya İnstitutunun ölkəmizdə öz profili üzrə səhiyyə mədəniyyətinin yaradılması, təbliğ və təşviqində önəmli mövqeyə sahib olduğunu bildirib.  Qeyd edib ki, insanlara sağlamlıq bəxş etmək, elmin bu sahəyə tətbiqi imkanlarını genişləndirmək, yenilikləri öyrənmək və icra etmək təqdirəlayiq hadisədir.

 

Cəmilə Qurbanovanın bu müəssisəyə 2014-cü ildən rəhbərlik etdiyini deyən millət vəkili ETMGİ-nin binasının əsaslı təmirdən sonra açılışının 2017-ci ildə Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın iştirakı ilə baş tutduğunu xatırladıb.

 

O, hazırda institutun güclü kadr potensialı ilə seçildiyini deyərək, burada 46 elmi işçi, 67 həkim, 5 doktorant, 12 həkim-rezident, o cümlədən 2 tibb elmləri doktoru, 24 tibb üzrə fəlsəfə doktoru olmaqla 428 əməkdaşın çalışdığını diqqətə çatdırıb.

 

"ETMGİ respublikada ana və uşaqların sağlamlığının monitorinqi, çox yayılmış xəstəliklərin müalicə və profilaktikası üsullarının təkmilləşdirilməsi kimi mühüm elmi istiqamətə malikdir. Bu anlamda, ana, döl və yenidoğulmuşların sağlamlığının qorunması, insanın reproduktiv funksiyasının fiziologiyası və patologiyasının öyrənilməsi xüsusi əhəmiyyət daşıyır", - deyə komitə sədri əlavə edib.

 

Daha sonra Qənirə Paşayeva ETMGİ direktoruna Qarabağ motivli xatirə hədiyyəsi bağışlayıb.

 

Prof. Cəmilə Qurbanova təbrikə və səmimi görüşə görə millət vəkilinə təşəkkür edib.

 

Görüşdə “NƏFƏS” İB sədri Firəngiz Balakişiyeva da iştirak edib.