Yanvarın 9-u Əməkdar həkim, Mərkəzi Neftçilər Xəstəxanasının mərhum baş həkimi, tibb elmləri doktoru Fəxrəddin Cavadovun vəfatından 13 il ötür.

Aztibb.az xəbər verir ki, istedadlı həkim F.Cavadov 1974-cü ildə Azərbaycan Dövlət Tibb İnstitutunu (ATU) bitirmiş, 1985-ci ildə namizədlik, 2008-ci ildə doktorluq dissertasiyalarını müdafiə etmişdir. O, ayrı-ayrı tibb müəssisələrində və digər qurumlarda işləmiş, 2000-ci ildən ömrünün sonunadək Mərkəzi Neftçilər Xəstəxanasının baş həkimi olmuşdur.

F.Cavadov Qafqaz və Orta Asiyada ilk dəfə canlı insandan digərinə qaraciyər transplantasiyası əməliyyatını gerçəkləşdirməyə nail olmuşdur. Səmərəli xidmətlərinə görə “Tərəqqi” və digər medallarla təltif edilmiş, “Azərbaycan Respublikasının Əməkdar həkimi” fəxri adına layiq görülmüşdür. 

O, 2009-cu il yanvarın 9-da 57 yaşında dünyasını dəyişmişdir.

Mərkəzi Neftçilər Xəstəxanasının kollektivi həkim-alim F.Cavadovun anım günü ilə əlaqədar onun məzarını ziyarət etmiş, məzarı önünə əklil və gül dəstələri qoymuşlar.