Bayram günlərində Sumqayıt Şəhər Təcili Tibbi Yardım Stansiyasının çağırış mərkəzinə 1563 müraciət daxil olub. Tibbi Yardım Stansiyasının əməkdaşları hər bir müraciətə operativ və diqqətlə yanaşıblar.
Tibb müəssisəsinin baş həkimi İlkin Namazov bildirib ki, Tibbi Yardım Stansiyasının əməkdaşları dekabrın 31-dən yanvarın 3-dək gücləndirilmiş rejimdə çalışıblar. Bu günlərdə müraciətlərin çoxu yüksək hərarətlə əlaqədar olub. Müraciət edən vətəndaşların hər birindən COVID-19 testi götürülüb. Götürülən testlərin 10 faizi pozitiv nəticələnib və müvafiq protokola uyğun hərəkət edilib.
Bayram günlərində kriminal tərkibli çağırışlarda ölüm olmasa da, evlərə çağırışlar zamanı 20 ölüm qeydə alınıb.
Qeyd edək ki, Sumqayıt Şəhər Təcili Tibbi Yardım Stansiyası şəhər ərazisi ilə yanaşı, 13-cü mikrorayon və H.Z.Tağıyev qəsəbəsində də fəaliyyət göstərir. Stansiyada 93 həkim və 120 orta tibb işçisi əhalinin sağlamlığının keşiyindədir. İkinövbəli rejimdə işləyən stansiyada hər növbədə 18 tibbi briqada çalışır.