Qeyd edək ki, Dmitriy Solnsev müharibədən əvvəl Mərkəzin nəzdində fəaliyyət göstərən modul tipli xəstəxanada koronavirusla mübarizəyə könüllü qoşulanlardan olub. Milliyyətcə rus olan 25 yaşlı şəhidimiz valideynlərini erkən itirmiş və bacısı Yuliya ilə birgə yaşamışdı. 

 

Şəhidin bacısı Yuliya Solnsevlə söhbətində Kliniki Tibbi Mərkəzin direktoru Könül Ələkbərov bildirib ki, məhz Dmitriy kimi şəhidlərimizin sayəsində bütün dünya bir daha Azərbaycanın həqiqətən də çoxmillətli dövlət olduğuna əmin oldu. O, torpaqlarımızın azadlığı uğrunda şəhidlik zirvəsinə yüksələn bütün qəhrəmanlarımızın, eləcə də Dmitriy Solnsevin xatirəsinin xalqımızın qəlbində yaşayacağını qeyd edib.

 

Şəhidin bacısı Yuliya Solnseva şəhidlik zirvəsinə ucalan qardaşı ilə fəxr etdiyini deyib, göstərilən diqqətə görə Mərkəzin rəhbərliyinə minnətdarlığını bildirib: “Dmitriy həm bakalavr, həm də magistratura təhsili almışdı. Hətta magistraturanı qırmızı diplomla bitirmişdi. İşləmək, insanlara kömək etmək onun əsas istəyi idi. Elə buna görə də könüllü olaraq koronavirusla mübarizəyə qoşulmaq üçün sizin Mərkəzdə işləməyə getmişdi. O, koronavirusla mübarizəyə də, müharibəyə də könüllü qoşulmuşdu".

 

Xatırladaq ki, Dmitriy Solnsev okytabrın 24-də Qubadlı uğrunda gedən döyüşlərdə qəhrəmancasına şəhid olub. Döyüşlərdə göstərdiyi şücaətə görə “Vətən uğrunda”, “Xocavəndin azad olunmasına görə" və “Füzulinin azad olunmasına görə” medalları ilə təltif olunub.