Son 10 il ərzində Rusiya Federasiyasında cərrah mama-ginekoloq kimi çalışmış həkim Nigar Yusifova bundan sonra fəaliyyətini Kliniki Tibbi Mərkəzdə davam etdirəcək.
Aztibb.az-a Mərkəzdən verilən məlumata görə, cərrah mama-ginekoloq Nigar Yusifova Kliniki Tibbi Mərkəzin tabeliyində olan 5 nömrəli Kliniki Doğum Evinin cərrah mama-ginekoloqu təyin edilib.
Qeyd edək ki, 40 yaşlı Nigar Yusifova orta təhsilini Bakı şəhəri 5 saylı Kimya Biologiya təmayüllü liseydə alıb. O, 1998-2004-cü illərdə Azərbaycan Tibb Universitetinin (ATU) Müalicə işi fakültəsində oxuyub. 2004-2006-cı illərdə klinik ordinatura təhsilini mama-ginekoloq kimi Rusiya Federasiyasının Ural Tibb Akademiyasında davam etdirib.
2008-2011-ci illərdə Rusiyanın Yekaterinburq şəhərində 7 saylı Doğum Evində həkim cərrah mama-ginekoloq işləyib. 2011-2021-ci illərdə isə eyni şəhərdə yerləşən Klinik Perinatal Mərkəzdə həkim cərrah mama-ginekoloq kimi fəaliyyət göstərib.