Mərkəzi Gömrük Hospitalının beynəlxalq protokollara uyğun olaraq ən müasir tibbi avadanlıqla təchiz olunmuş ambulansı və yüksəkixtisaslı təcili yardım həkimləri kimya sənayesinin region üzrə lideri olan “SOCAR Polymer” şirkətinin əməkdaşlarına sutkada 24 saat təcili tibbi yardım xidməti göstərir.

 

Aztibb.az xəbər verir ki, Gömrük Hospitalının Təcili tibbi yardım şöbəsi peşəkar, təcrübəli, xarici ölkələrdə təlim kursları keçmiş həkim heyəti ilə xəstələrə keyfiyyətli və zamanında təcili tibbi yardım göstərir, ehtiyac varsa tibbi təxliyyəni təmin edir, monitorinq və reanimasiya tədbirlərini keyfiyyətlə həyata keçirir.

 

“SOCAR Polymer” neft-kimya kompleksi nəzdində Mərkəzi Gömrük Hospitalının Təcili yardım məntəqəsi təkcə zavodun işçilərinə deyil, kompleksə daxil olan TIR maşınlarının sürücülərinə də tibbi xidmət göstərir. Burada həm “SOCAR Polymer” şirkətinin ərazisində tibbi çeşidləmə həyata keçirilir, həm də ilkin tibbi yardım göstərilir. Məntəqədə məsul təcili yardım həkimi Tofiq Bayramov, təcili yardım həkimləri - Kənan Tağıyev, Xəqani Muradov, Rasim Kərimov və reanimobil sürücüləri - Nəriman Abdullayev, Rəşad Əliyev və Fərhad Qubadov 24 saat ərzində növbə ilə fəaliyyət göstərirlər.

 

Təcili yardım məntəqəsinə hər gün 8-10 nəfər müxtəlif səbəblərlə: yuxarı tənəffüs yollarının infeksiyaları, travmalar, yanıqlar, müxtəlif yaralar, yüksək hipertenziya, baş ağrıları, qarın ağrıları və s. müraciət edir. İl ərzində bu müraciətlərin sayı 480-500 olur. Son iki ildə 1000-ə yaxın  müraciət qeydə alınmışdır. Məntəqədə zəruri olan bütün avadanlıqlar, hətta ağır xəstələr üçün nəzərdə tutulmuş süni tənəffüs aparatı və narkoz vermək üçün istifadə olunan avadanlıqlar, eləcə də elektrokardioqraf (EKQ) və kardioverter-defibrillyator var.

 

Mərkəzi Gömrük Hospitalının Təcili tibbi yardım şöbəsinin rəisi Dr.Nərgiz Kərimova bildirib ki, “SOCAR Polymer” neft-kimya kompleksi nəzdində fəaliyyət göstərən Təcili yardım məntəqəsinin bütün zəruri tibbi ləvazimatları, avadanlıqları, dərman preparatları və habelə tibbi heyətin xüsusi geyimləri Hospital tərəfindən təchiz edilir. Məntəqədə zəruri avadanlıqlarla təchiz edilmiş reanimobillər gecə-gündüz insanların xidmətindədir.

 

COVID-19 pandemiyası ilə əlaqədar olaraq koronavirusa yoluxmaların artmasının qarşısını almaq məqsədilə qızdırmalı və kovid əlamətləri olan xəstələr barədə müvafiq yerlərə məlumat verilir və onlar lazım gələrsə, xəstəxanalara yönəldilir. Belə xəstələri müvafiq yerlərə göndərənə qədər onlara protokollara uyğun ilkin tibbi yardım göstərilir. Məntəqədə hər xəstə qəbulundan sonra dezinfeksiya işləri aparılır.

 

Qeyd edək ki, SOCAR Polymer Sumqayıt Kimya-sənaye Parkının rezidenti olub, neft kimya sektorunda Azərbaycanda ilk dövlət-özəl partnyorluğu hesab edilir. Məhsulları yüksək təzyiqli qaz və su borularının, avtomobil sənayesi üçün detalların istehsalında, həmçinin, tibb avadanlıqları, elektron və elektrik cihazlarının hazırlanması zamanı istifadə olunur.