Mərkəzi Gömrük Hospitalının Urologiya şöbəsinin rəisi, uzman uroloq Bəhruz Xalıqov Azərbaycan Respublikası Səhiyyə Nazirliyi Milli Onkologiya Mərkəzinin və Azərbaycan Onkoloqlar Cəmiyyətinin təşkilatçılığı ilə Bakıda hibrid formatda keçirilən IV Beynəlxalq uroonkologiya simpoziumunda “İnvaziv kisəsi xərçənginə yanaşma” mövzusunda çıxış edib.

 

IV Beynəlxalq Uroonkologiya simpoziumunda Azərbaycanla yanaşı, Amerika Birləşmiş Ştatları, Türkiyə, Almaniya və Fransadan olan mütəxəssislər uroonkoloji xəstəliklərlə bağlı təqdimatlarla çıxış ediblər.

 

Aztibb.az-ın daha öncə xəbər verdiyi kimi, tədbirdə onkologiyanın aktual problemləri, müasir dövrdə onkoloji xəstəliklərin müalicəsində tətbiq edilən yeniliklər müzakirə olunub, təcrübə mübadiləsi aparılıb.

 

Simpoziumda “Yuxarı sidik yolları xərçənginin müalicəsinə müasir yanaşma”, “MRT-nin prostat vəzi xərçənginin diaqnostikasında rolu”, “PSA və MRİ-fusion biopsiyası”, “Yüksək risk qrup xəstələrində radikal prostatektomiya”, “Oliqometastatik prostat vəzi xərçəngi”, “Metastatik prostat vəzi xərçəngində molekulyar diaqnostika və 177Lu/225Ac-PSMA ilə target müalicə”, “Laporoskopik radikal nefrektomiya: Böyrək şişlər üçün qızıl standart”, “Genetik markerlərin böyrək xərçəngində proqnostik əhəmiyyəti”, “Sidik kisəsinin xərçəngönü xəstəlikləri”, “İnsidental adrenal törəmələrə yanaşma” və “Laporoskopik adrenalektomiya: Biz bunu necə edirik?” mövzularında məruzələr dinlənilib.

 

Məruzələr ətrafında geniş fikir mübadiləsi aparılıb, simpoziumun əhəmiyyəti yüksək qiymətləndirilib.