Uşaqların sosiallaşması, bağçaya getməsi üçün 1 yaş 8 aylıq və ya 2 yaşlı olması normal hesab edilir. Lakin daha erkən dönəmdə uşağın nitqi varsa, qavraması və özünü ifadə etməsi yaxşıdırsa uşaqların sosiallaşması üçün tədbirlər görülə bilər.

Aztibb.az xəbər verir ki, bu barədə  “Ondan öyrənirik” adlı layihənin “Uşaqların sosiallaşması və inkişafı” mövzusuna həsr olunmuş növbəti buraxılışında Sağlam Nitq Psixoloji Mərkəzinin uşaq psixoloqu Mehriban Mürşüdlü bildirib. 

Həkim qeyd edib ki, uşaqların ilkin sosiallaşma mərhələsi ev şəraitində baş verir. Uşağın ana və ata, daha sonra nənə, baba, bibi, dayı və s. ilə ünsiyyət qurması artıq onun sosiallaşması deməkdir.

“Valideynlər uşağı bir otaqda qoyub digər otağa keçdikdə uşaq ağlamağa başlayırsa bu, onun sosiallaşmaqda çətinliyi olduğunu göstərir, - deyə bildirən M.Mürşüdlü bu problem aradan qaldırmağın yollarından bəhs edib.

Onun sözlərinə görə, uşağı sosiallaşmağa təşviq etmək üçün ilkin növbədə, onu yaxın qohumlar, məsələn nənə və ya baba ilə bir neçə dəqiqəlik bir otaqda qoyaraq çıxmaq lazımdır. Uşaq həmin insanla qalmağa öyrəşdikdə eyni prosesi başqa insanla təkrarlamaq lazımdır.

Qeyd edək ki, “Ondan öyrənirik” adlı layihənin sponsoru və  informasiya dəstəkçisi Aztibb.az saytıdır.