Aztibb.az xəbər verir ki, Mərkəzin heyətindən 10-dan çox həkim müharibə dövründə öz istəyi ilə cəbhə bölgəsinə yollanıb. Onlar düşmən məğlub olana qədər savaşıb, yaralara məlhəm qoyub və ən nəhayət neçə-neçə əsgəri həyata qaytarıblar.

 

Mərkəzin “Zəfər həkimlərimiz” rubrikasının ilk qonağı Kliniki Tibbi Mərkəzin müharibənin başlaması xəbərinə sevinən həkimi, üz-çənə cərrahı Rəşad Məmmədzadədir

 

“Müharibə xoş bir şey olmasa da, qələbənin bizim olmasını, torpaqların qayıtmasını istəyirdim. Daha sonra əlimdən gələni etmək üçün könüllü müraciət etdim. İlk olaraq oktyabrın 10-dan 17-nə qədər Yevlax Mərkəzi Xəstəxanasına, daha sonra Füzuli Diaqnostika Mərkəzinə ezam olundum”, - deyə həkim bildirib. 

 

Rəşad həkim müharibə günlərini belə xatırlayır:

 

“Ən ağır mənzərə xəstəxanalara şəhidlərimizin valideynlərinin gəlməsi idi. Onlar övladlarını tanımaq, axtarmaq üçün bura gəlirdilər. Elə valideynlər olurdu ki, heç kimi pis olmağa qoymurdular və deyirdilər ki, oğulları ilə fəxr edirlər. Həmin anları ömür boyu unuda bilmərəm.

Bir də Şuşa alınan gün yadımdadır. Hamımız həm sevinib, həm kədərlənirdik. Pis olurduq ki, şəhidlərimiz oldu. Sevinirdik ki, onların qanları batmadı və torpaqlarımızı azad edə bildik".