ÜST-ün Avropa üzrə Regional ofisinin Data və analitika şöbəsinin rəhbəri David Novillo Ortiz və ÜST-ün məsləhətçisi Andrea Şmidt Səhiyyə İnformasiya Sisteminin (SİS) qiymətləndirilməsini həyata keçirmək üçün Azərbaycana səfər edib.

 

Qiymətləndirmə səhiyyə sistemi strategiyasının hazırlanmasının bütün aspektlərini - mövcud sistemin qiymətləndirilməsindən strategiyanın tətbiqi və dəyərləndirilməsinə qədər "ÜST/Avropa regionunun Səhiyyə informasiya sistemlərinin gücləndirilməsi üçün metodik vəsait: səhiyyə informasiya sisteminin qiymətləndirilməsi və strategiya hazırlanması" üzrə təlimat vasitəsilə aparılıb. Həmçinin vəsait SİS-in məlumatların toplanması, analizi, səhiyyə hesabatı, biliklərin ötürülməsi, idarəetmə və mənbələr kimi müxtəlif elementlərini əhatə edir.

 

Qiymətləndirmə çərçivəsində missiya üzvləri Səhiyyə İnformasiya Sistemi mövzusunda Səhiyyə Nazirliyi, Dövlət Statistika Komitəsi, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, İcbari Tibbi Sığorta üzrə Dövlət Agentliyi və TƏBİB-in nümayəndələri ilə görüşlər keçiriblər.

 

Bundan əlavə, ekspertlər Bakı şəhərində 1 saylı Klinik Tibb Mərkəzi, 1 saylı Uşaq Poliklinikası, "Bonadea International Hospital", Şamaxı Rayon Mərkəzi Xəstəxanası və Göylər kənd Ailə Sağlamlıq Mərkəzinə səfər ediblər.

 

Missiya maraqlı tərəflərin iştirakı ilə əsas nəticələrin və növbəti addımların müzakirə olunduğu brifinqlə yekunlaşdırılıb.