Dekiabrın 14-də Mərkəzi Gömrük Hospitalının Mama-ginekologiya şöbəsinin rezidenti Güllüxanım Həsənli “Miomalar” mövzusunda geniş təqdimatla çıxış edib.

 

Aztibb.az xəbər verir ki, hibrid formatda təşkil olunan toplantıda Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini İsmayıl Əfəndiyev, Mərkəzi Gömrük Hospitalının rəis müavini Rəna Qasımova, eləcə də hospitalın müvafiq ixtisaslı həkimləri və rezidentləri iştirak ediblər.

 

Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.f.d., dosent İsmayıl Əfəndiyev Mərkəzi Gömrük Hospitalında rezidentlərin ixtisaslaşması üçün mütəmadi olaraq həyata keçirilən tədbirlər barədə məlumat verib və bu görüşlərin silsilə şəklində davam etdiriləcəyini vurğulayıb.

 

Daha sonra G.Həsənlinin “Miomalar” mövzusunda hazırladığı təqdimat dinlənilib, iştirakçılar tərəfindən səsləndirilən suallar cavablandırılıb, rəy və təkliflər səsləndirilib.

 

Toplantının sonunda Mərkəzi Gömrük Hospitalının rəis müavini Rəna Qasımova G.Həsənlinin çıxışını yüksək qiymətləndirib, ona və kuratoru Mama-ginekologiya şöbəsinin rəisi, t.f.d. Təranə Bayramovaya fəaliyyətlərində uğurlar arzu edib.